منصوبہ بند سازش کے تحت بٹہ مالو بس اسٹینڈ کو دوسری جگہ منتقل کیا گیا‘رینا کا الزما

سرینگر//
جموںکشمیر بی جے پی یونٹ کے صدر رویند ر رینا نے پیر کے روز کہاکہ بٹہ مالو بس اسٹینڈ کی عظمت رفتہ اور شان و شوکت بحال کرنے کی خاطر بہت جلد اقدامات اٹھائے جارہے ہیں۔
رینانے کہاکہ جموںکشمیر ہائی کورٹ نے حکومت کو کہا ہے کہ بٹہ مالو کے لوگوں کی آواز سنی جائے اور اس مسئلے کو جلد ازجلد حل کیا جائے ۔ان کے مطابق سابقہ حکمرانوں نے ایک منصوبہ بند سازش کے تحت بٹہ مالو بس اسٹینڈ کو دوسری جگہ منتقل کیا اوراس طرح سے یہاں کے غریبوں کے ساتھ نا انصافی کی گئی۔
ان باتوں کا اظہار رویندر رینا نے بٹہ مالوایک بڑے عوامی اجتماع سے خطاب کے دوران کیا۔
رینا نے کہا بٹہ مالو بس اسٹینڈ کی رونقیں بہت جلد واپس لوٹ آئے گی کیونکہ ہائی کورٹ نے اس معاملے میں مداخلت کی اور جموں وکشمیر سرکار کو ہدایت دی ہے کہ لوگوں کی آواز سنی جائے اور اس مسئلے کو ہمیشہ ہمیشہ کے لئے حل کیا جائے ۔انہوں نے کہاکہ بھاجپا ہر چیز میں سیاست کرنے میں یقین نہیں رکھتی بلکہ لوگوں کے مسائل حل کرنا ہماری اولین ترجیحات میں شامل ہیں۔
بی جے پی کے یونٹ صدر نے کہاکہ سال ۲۰۱۷میں اس وقت کی حکومت نے بٹہ مالو بس اسٹینڈ اور جموں اڈے کو منتقل کرنے کا آرڈر نکالا تاہم بھاجپا ممبران اسمبلی نے اس پر ایوان میں شور مچایا اور اپنے لوگوں کیلئے ڈٹے رہے ۔
رینا نے بتایا کہ حکومت نے جموں بس اڈے کو منتقل نہیں کیا لیکن بٹہ مالو بس اسٹینڈ کو ایک منصوبہ بند سازش کے تحت دوسری جگہ منتقل کرکے لوگوں کے پیٹ میں چھرا گھونپ دیا گیا۔انہوں نے کہا کہ یہاں کے سیاستدانوں نے بٹہ مالو کو ویران کرکے لوگوں کے ساتھ بہت بڑی نا انصافی کی۔
بی جے پی یونٹ صدرکے مطابق جب وزیر داخلہ کشمیر کے دورے پر بارہمولہ پہنچے تو میں نے وکیل بن کر بٹہ مالو کا معاملہ اٹھایا اور اسی وقت امیت شاہ نے چیف سیکریٹری اور ٹرانسپورٹ کمشنر کو اس حوالے سے رپورٹ پیش کرنے کی ہدایت دی۔
رینانے بتایا کہ ہر معاملے میں سیاست اچھی بات نہیں ، ہمیں خدمت خلق‘ حب الوطنی کا جذبہ جس کا ذکر پیارے نبی ؐ نے کیا ہے وہ ہر شخص کے دل میں ہونا چاہئے ۔انہوں نے کہا کہ جب بھی عوام کو کوئی پریشانی ہوگی تو بی جے پی ان کے مسائل حل کرنے کی خاطر پوری طرح سے تیار ہیں۔
بی جے پی یونٹ صدرنے کہاکہ حال ہی میں بٹہ مالو کے تاجروں نے جموں میں سینئر وکلا کے ساتھ ملاقات جس کے بعد ججوں کے سامنے اس معاملے کو اٹھایا گیا۔انہوں نے کہاکہ جموںکشمیر ہائی کورٹ نے فیصلہ سنایا ہے کہ بٹہ مالو کی آواز سنی جائے اور اس معاملے کو حل کیا جائے ۔
رینانے کہاکہ بہت جلد تاجر برادری کے لوگ اس معاملے کو لے کر چیف سیکریٹری ، ایل جی منوج سنہا سے ملاقات کریں گے اور اگر ضرورت پڑی تو وزیر داخلہ امیت شاہ سے بھی ملاقی ہونگے ۔