جموں/20مارچ
جموں وکشمیر کی سرمائی راجدھانی جموں میں امیدواروں کی ایک بڑی تعداد نے پیر کے روز ایپ ٹیک کے خلاف احتجاج کیااور فوری طورپر کمپنی کا کنٹریکٹ ختم کرنے کا مطالبہ کیا۔
مظاہرین نے بتایاکہ اس کمپنی کو ملک کی مختلف ریاستوں میں بلیک لسٹ قرار دیا گیا ہے ۔
یو این آئی اردو کے نامہ نگار نے بتایا کہ جموں میں ایپ ٹیک کے خلاف امیدواروں کی ایک بڑی تعداد نے سڑکوں پر آکر احتجاجی مظاہرئے کئے ۔انہوں نے کہاکہ گھوٹالوں کے باوجود بھی ایپ ٹیک کو ٹھیکہ الاٹ کیا گیا جو سمجھ سے بالاتر ہے ۔
ان کے مطابق ایل جی انتظامیہ کا کہنا ہے کہ شفاف طریقے سے امتحانات منعقد کئے جائیں گے لیکن جس کمپنی کو پہلے ہی بلیک لسٹ قرار دیا گیا اس کو کیسے کنٹریکٹ دیا جا سکتا ہے ۔
انہوں نے مزید بتایا کہ اس سب کے پیچھے ایک بہت بڑی سازش ہے لہذا انتظامیہ کو امیدواروں کے خدشات کو دور کرنے کی خاطر اس کمپنی کا کنٹریکٹ کالعدم قرار دینا چاہئے ۔
بتادیں کہ جموں وکشمیر انتظامیہ نے ایپ ٹیک نامی ممبئی نشین کمپنی کو مختلف اسامیوں کو پر کرنے کی خاطر امتحانات لینے کی ذمہ داری سونپی ہے تاہم امیدوار مسلسل احتجاج کر رہے ہیں کہ اس کمپنی کا ریکارڈ ملک بھر میں ٹھیک نہیں ۔