سرینگر/۱۸مارچ
جنوبی کشمیر کے ضلع پلوامہ کے اونتی پورہ میں ایک سڑک حادثے میں بہار سے تعلق رکھنے والے کم سے کم چار مسافر از جان جبکہ کئی دیگر زخمی ہوگئے ۔
سرکاری ذرائع نے بتایا کہ اونتی پورہ کے گوری پورہ علاقے میں قومی شاہراہ پر ایک گاڑی الٹ جانے سے کئی مسافر زخمی ہوگئے ۔
ذرائع نے کہا کہ زخمیوں میں سے تین کی ہسپتال لے جانے کے دوران راستے میں ہی موت واقع ہوئی جبکہ ایک مسافر سب ضلع ہسپتال پامپور میں زخموں کی تاب نہ لا کر دم توڑ گیا۔
زخمیوں میں سے بعض کی حالت نازک بتائی جاتی ہے ۔
متوفین کی شناخت نصیر الدین انصاری ولد اسلام انصاری ساکن مغربی چمپارن بہار، راج کرن داس ولد شیوا ساکن کٹھیار بہار، سلیم علی ولد محمد علا ولدین ساکن حکم نگر بہار اور قیصر عالم ساکن کٹھیار بہار کے بطور ہوئی ہے ۔
دریں اثنا پولیس نے اس ضمن میں ایک کیس درج کرکے تحقیقات شروع کی ہیں۔
دریں اثنا جموں وکشمیر کے لیفٹیننٹ گورنر منوج سنہا نے حادثے پر گہرے رنج و غم کا اظہار کیا ہے ۔
سنہانے ضلع انتظامیہ سے متاثرین کو ہر ممکن مدد فراہم کرنے کی ہدیات دی ہیں۔
لیفٹیننٹ گورنر نے اس واقعے پر اظہار غم کرتے ہوئے اپنے ایک ٹویٹ میں کہا’’اونتی پورہ میں آج ہونے والے بس حادثے جس میں قیمتی جانیں ضائع ہوئیں اور کئی دیگر زخمی ہوگئے ‘ سے رنج و غم ہوا، میں نے ضلع انتظامیہ کو متاثرین کو ہر ممکن مدد فراہم کرنے کی ہدایات جاری کی ہیں‘‘۔
سنہا نے اپنے ایک اور ٹویٹ میں کہا’’ضلع انتظامیہ بہار کے ان غمزدہ کنبوں کے ساتھ مسلسل رابطے میں ہے ‘‘۔ان کا کہنا تھا’’میں غمزدہ کنبوں کو تعزیت پیش کرتا ہوں اور زخمیوں کی جلد صحت یابی کیلئے دعا گو ہوں۔‘‘
اس دوران سڑک حادثے میں فوت ہونے والے افراد کے لواحقین کے حق میں ایک لاکھ روپے جبکہ شدید زخمی ہونے والے افراد کے لیے پچیس ہزار روپے ایکس گریشا کی رقم منظور کرنے کا اعلان کرتے ہوئے ڈپٹی کمشنر پلوامہ بصیر الحق چودھری نے بتایا کہ ہلاک شدگان کی لاشوں کو گھر بھیجنے کے لیے سرکاری سطح پر تمام ضروری انتظامات کیے جا رہے ہیں۔
میڈیا کے ساتھ گفتگو کرتے ہوئے ضلع ترقیاتی کمشنر پلوامہ بصیرالحق چودھری نے بتایا کہ آج صبح ہوئے المناک حادثے میں چار افراد ہلاک جبکہ متعدد افراد زخمی ہوگئے ہیں۔انہوں نے بتایا کہ زخمیوں کو علاج معالجے کے لیے ضلع انتظامیہ کی جانب سے بروقت انتطامات کیے گئے ہیں اور ایل جی منوج سنہا کی ہدایات پرمارے گئے افراد کے لواحقین میں ایک لاکھ روپے جبکہ شدید زخمیوں میں پچیس ہزار روپے کی ایکس گریشا منظور کی گئی ہے۔
چودھری نے کہا کہ معمولی زخمیوں کو دس ہزار روپے کی رقم بطور ایکس گریشا ملے گی۔
ڈی سی نے مزید بتایا کہ لاشوں کو ان کے گھر بھیجنے کے لیے انتظامیہ اقدامات کر رہی ہے جس کے لیے تمام خرچہ ضلع انتظامیہ ہی برداشت کرے گا۔چودھری نے بتایا کہ قومی شاہراہ پر بالخصوص سڑکوں پر گاڑیاں چلاتے وقت تیز نہ چلائیں کیونکہ اکثر حادثات تیز رفتاری کی وجہ سے ہی واقع ہوتے ہیں۔