سرینگر//
مبلغ سرجان برکاتی کی جانب سے فنڈز جمع کرنے کے کیس کے سلسلے میں ایس آئی اے کی ٹیم نے ہفتہ کو جنوبی کشمیر میںمتعدد مقامات پر چھاپے ڈالے ۔
ایس آئی اے کی ٹیم نے جنوبی کشمیر کے متعدد مقامات پر چھاپے مار کر کئی اہم دستاویز، الیکٹرانک گیجٹس وغیرہ ضبط کر لئے ہیں۔
ایس آئی کی جانب سے اس ضمن میں جاری بیان کے مطابق ہفتہ کی صبح جنوبی کشمیر کے آٹھ مختلف مقامات پر چھاپے مارے گئے۔
یہ چھاپے معروف شعلہ بیان مقرر سرجان برکاتی کے ذریعے جمع کیے گئے فنڈ سے متعلق مارے گئے۔ ایس آئی نے اس ضمن میں کراؤڈ فنڈنگ سے متعلق ایک ایف آئی آر ۰۲/۲۳ درج کی ہے۔
ایف آئی آر میں شعلہ بیان مقرر اور علیحدگی پسند سرجان برکاتی اور دیگر افرد کے خلاف درج ہے‘ جس میں ڈیڑھ کروڑ روپے سے زائد رقم جمع کی گئی ہے۔
ایف آئی آر کے مطابق علیحدگی پسند سوچ کو فروغ اور تخریبی کارروائیاں انجام دینے کے ارادے سے رقم جمع کی گئی ہے جبکہ برکاتی کے اہل خانہ نے عوام سے جذباتی اپیل کرکے جمع کی ہے کہ جس میں عوام سے ان کی روز مرہ کی ضروریات کو پورا کرنے کیلئے مالی تعاون کی اپیل کی ہے۔
ایس آئی کے مطابق اس (فنڈ جمع کرنے کی اپیل کی) آڑ میں نہ صرف بھاری رقم حاصل کی گئی ہے بلکہ نامعلوم ذرائع سے آنے والی رقم کی بھی لانڈرنگ کی گئی جس کے بارے میں شبہ ہے کہ یہ رقم عسکریت پسندی اور علیحدگی پسندی کی مضبوط بنانے کیلئے جمع کی گئی ہے۔