صاحب یہ چل کیا رہاہے… یہ دنیا میں ہو کیا رہا ہے … اور جو ہو رہا ہے ‘ اللہ میاں کی قسم بڑا اچھا ہو رہا ہے… اچھا اس لئے ہو رہا ہے کیونکہ … کیونکہ ہمیں اس میں مزہ آرہا ہے… مزہ اس لئے آرہاہے کیونکہ …امریکہ ‘ جو عالمی پولیس مین کا رول ادا کرتا آیا ہے اور… اور کئی دہائیوں کرتاآیاہے … اس رول کو نبھاتے نبھاتے اس نے معصوموں کے خون سے اپنے ہاتھ رنگ لئے تھے… ہزاروں اور لاکھوں معصوموں کے خون سے… وہ اب حاشیہ پر چلا جارہا ہے… اس کا عالمی پولیس مین بنے رہنے کاخواب اب ٹوٹ رہا ہے اور… اور اللہ میاں کی قسم بڑی تیزی سے ٹوٹ رہا ہے… ہم سب نے سوچا تھا کہ آج نہیں تو کل … کل نہیں تو پرسوں ‘لیکن ایک دن ضرور سعودی عرب اور ایران میں تعلقات… سفارتی تعلقات بحال ہو جائیں گے… لیکن اللہ میاں کی قسم یہ کسی نے نہیں سوچا تھا کہ تعلقات کی بحالی میں چین ثالث کا کردار ادا کرے گا … امریکہ نہیں ‘ بالکل بھی نہیں ۔سعودی عرب اور ایران میں تعلقات کی بحالی سے زیادہ حیران کن بات یہ ہے کہ یہ سب کچھ چین کی ثالثی میں ہوا اور… اور امریکہ ہاتھ ملتے رہ گیا… یہ اپنے آپ میں ایک بڑی بات ہے‘ جس کے دور رس نتائج ہوں گے… کہ… کہ بات یہیں پر ختم نہیں ہو رہی ہے… یوکرین میں جاری جنگ سے بھی عالمی سطح پر ایک نئی صف بندی دیکھنے میں آ رہی ہے اور… اور اس نئی صف بندی میں بھی امریکہ دور دور تک کہیں دکھائی نہیں دے رہا ہے کہ … کہ خبر یہ ہے کہ چین کے صدر ‘ روس کے ہم منصب کی دعوت پر ماسکو جا رہے ہیں… موسم کا حال چال دیکھنے اور پو چھنے نہیں بلکہ یوکرین میں جو ہو رہا ہے… دنیا میں دوسرے ممالک میں جو ہو رہا ہے ‘ اس پر بات چیت کیلئے … خیالات کا تبادلہ کرنے کیلئے …کہ ابھی دو دن پہلے ہی شام کے صدر نے روس کے صد ر سے ملاقات کی تھی… اور بائیڈن کا امریکہ دور سے تماشہ دیکھتا رہ گیا…اور اس لئے رہ گیا کہ… کہ ہرعروج کا زوال ہوتا ہے… ہم یہ تو نہیں کہہ رہے ہیں کہ … کہ امریکہ کا زوال شروع ہو گیا ہے… ہم ایسا بالکل بھی نہیں کہہ رہے ہیں کہ یہ ایک بڑی بات ہے جو ہمارے جیسے چھوٹے منہ سے نہیں کہی جا سکتی ہے… ہاں البتہ ہم اتنا ضرور کہہ رہے ہیںکہ… کہ امریکہ کا دنیا پر جو دبدبہ تھا وہ کم ہورہا ہے… امریکہ جو عالمی پولیس مین کا رول نبھاتا آیا ہے… اس رول کو اس سے چھیننے کیلئے کچھ ایک قوتوں ‘ کچھ ایک طاقتوں ‘ کچھ ایک ممالک کا دنیا میں ظہور ہوا ہے اور… اور دنیا میں جو کچھ ہو رہاہے وہ بھی اسی بات کی چغلی کھا رہا ہے اور… اور سو فیصد کھا رہا ہے ۔ ہے نا؟
