گلمرگ گنڈولہ:’ایک سال میں ایک سو کروڑ روپے کمائی کرنا معمولی بات نہیں ‘

سرینگر//
سیاحتی مقام گلمرگ میں ایشیا کے سب سے اونچے گنڈولہ کیبل کار پروجیکٹ نے اپریل ۲۰۲۲سے مارچ۲۰۲۳تک ایک سو کروڑ روپے ریکارڈ کمائی کی۔
گنڈولہ کیبل کار پروجیکٹ کے منیجنگ ڈائریکٹر غلام جیلانی زرگر نے میڈیا کو بتایا کہ گزشتہ روز ملک کے سب سے بڑے پلیٹ فارم پارلیمنٹ سے گلمرگ گنڈولہ کا نام ایک اچھی وجہ کیلئے لیا گیا جو انتہائی خوش آئند بات ہے ۔
بتادیں کہ مرکزی وزیر خزانہ نرملا سیتا رمن نے پیر کو پارلیمنٹ میں جموں وکشمیر کیلئے مالی سال۲۰۲۴۔۲۰۲۳کا مالی بجٹ پیش کرنے کے دوران کہا کہ گلمرگ گنڈولہ نے اپریل ۲۰۲۲سے مارچ۲۰۲۳تک ایک سو کروڑ روپیوں کی ریکارڈ کمائی کی۔
منیجنگ ڈائریکٹر نے کہا’’یہ ایک چھوٹے کارپوریشن کیلئے ایک بڑی حصولیابی ہے ۔ ایک سال میں ایک سو کروڑ روپیوں کی کمائی کرنا معمولی بات نہیں ہے‘‘ ۔
زرگر کا کہنا تھا ’’ مجھے لگتا ہے کہ گنڈولہ کی اس بڑی حصولیابی کو مد نظر رکھتے ہوئے پارلیمنٹ میں اس کا تذکرہ کیا گیا‘‘۔انہوں نے کہا کہ اس کامیابی کے پیچھے جموں وکشمیر حکومت کی انتھک کوششیں کار فرما ہے ۔انہوں نے کہا کہ حکومت نے شعبہ سیاحت کے فروغ کیلئے کئی اقدام کئے ہیں۔
منیجنگ ڈائریکٹر کا کہنا تھا کہ سیاحت جموں وکشمیر کی معیشت کیلئے ریڑھ کی ہڈی کی حیثیت رکھتی ہے اور اس کے ساتھ بے شمار لوگوں کی روزی روٹی وابستہ ہے ۔
زرگرنے کہا کہ وادی کی سیکورٹی صورتحال میں بہتری واقع ہوئی ہے جس کی وجہ سے سیاح یہاں اپنے آپ کو محفوظ محسوس کرتے ہیںانہوں نے کہاکہ جموں وکشمیر حکومت کی اس کامیابی کے پیچھے بہت ساری محنت کافرما ہے کیونکہ موجودہ سرکار نے سیاحتی شعبے کو ترقی دینے کیلئے غیر معمولی اقدامات کئے ہیں۔ان کے مطابق سیاحت جموں وکشمیر میں روزی کمانے کی ایک بڑی صنعت ہے ۔
زرگر کا مزید کہنا تھا کہ وادی کشمیر میں سیکورٹی صورتحال بہتر ہوئی ہے جس سے یہاں آنے والے سیاح اپنے آپ کو محفوظ تصور کر رہے ہیں۔انہوں نے کہاکہ حکومت اور محکمہ سیاحت نے ہندوستان کی مختلف ریاستوں اور بیرون ممالک میں سیاحت کے شعبے کے فروغ کیلئے کئی پروگرام منعقد کئے ہیں۔
منیجنگ ڈائریکٹر نے کہاکہ ان ٹھوس کوششوں کی بدولت ہی یہاں ریکارڈ سیاحوں کی آمد ہوئی ہے ۔انہوں نے کہاکہ ایک سو کروڑ کی کمائی کرنا ایک بہت بڑا چیلنج تھا کیونکہ یہاں آنے والے سیاحوں کو اچھی رہائشی سہولیات‘مہمان نوازی اور بہتر انفراسٹرکچر کی ضرورت ہے ۔انہوں نے مزید کہاکہ گلمرگ گنڈولہ کی آن لائن ٹکٹنگ کے ذریعے بھی سیاحوں راغب ہوئے ۔
زرگر نے کہاکہ کچھ عناصر ایسے بھی ہیں جو سیاحوں کو ٹکٹ بلیک میں فروخت کر رہے تھے تاہم اس پر اب خصوصی نظر رکھی جارہی ہے۔انہوں نے مزید بتایا کہ امسال پہلی دفعہ گنڈولا کی سواری کرنے والے سیاحوں کی حفاظت کیلئے پرائیوٹ سیکورٹی تعینات کی گی ۔ اس کے علاوہ مرد ، خواتین اور خاص طور پر معذور افراد کیلئے اچھے معیار کے واش رومز تعمیر کئے جس وجہ سے زیادہ سے زیادہ سیاحوں نے گنڈولہ کا لطف اٹھایا ۔
منیجنگ ڈائریکٹر نے مزید بتایا کہ ہم ان سیاحوں سے اپیل کرتے ہیں جو گلمرگ آنا چاہتے ہیں اور گنڈوالا کی سواری کے خواہاں ہے وہ اپنے سفری پروگرام کی منصوبہ بندی سے قبل ٹکٹ بک کریں تاکہ انہیں یہاں پر کسی قسم کی مشکل کا سامنا نہ کرنا پڑے ۔