سرینگر//
جموں کشمیر کے وسطی ضلع بڈگام کے سوئیہ بگ علاقے میں تیسرے روز بھی دوشیزہ کے قتل کے خلاف لوگوں نے سڑکوں پر آکر احتجاجی مظاہرئے کئے ۔
ضلع ترقیاتی کمشنر بڈگام اور ایس ایس پی بڈگام نے سوگوارن کے ساتھ ملاقات کی اور اُنہیں یقین دلایا کہ ملوث شخص کو قرار واقع سزا ملے گی۔
اطلاعات کے مطابق سوئیہ بگ بڈگام میں دوشیزہ کی ہلاکت کے خلاف لوگوں نے تیسرے روز بھی احتجاجی مظاہرے کئے اور مختلف مقامات پر جلوس بھی نکالے گئے ۔
مظاہرین قاتل کو پھانسی پر لٹکانے اور اُس کی جائیداد کو ضبط کرنے کا مطالبہ کر رہے تھے ۔انہوں نے کہاکہ دوشیزہ کا بے رحمی سے قتل کرکے اُس کے جسم کے ٹکڑے ٹکڑے کئے گئے لہذا قاتل کو کوئی رعایت نہیں ملنی چاہئے ۔ان کے مطابق قاتل کو سخت سے سخت سزا دلانے کی خاطر قانون نافذ کرنے والے ادارے کو کلیدی کردار ادا کرنا چاہئے ۔
معلوم ہوا ہے کہ پیر کی شام کو سوئیہ بگ بڈگام میں کینڈل لائٹ مارچ بھی نکالا گیا جس میں مردو زن نے شرکت کی۔
دریں اثنا ٹریڈریس فیڈریشن بڈگام نے سوگوارن کے ساتھ اظہار یکجہتی کی خاطر منگل کے روز احتجاجی مظاہرئے کئے ۔انہوں نے کہاکہ یہ واقع انسانیت سوز ہے اوراس کے خلاف سب کو آگے آنا چاہئے ۔تاجروں نے بتایا کہ قاتل کو سرراہ پھانسی پر لٹکا کر انصاف کے تقاضوں کو پورا کیا جانا چاہئے ۔
علاوہ ازیں ایس ایس پی بڈگام الطاہر گیلانی اور ڈپٹی کمشنر بڈگام نے منگل کے روز سوئیہ بگ بڈگام میں سوگوارن کے ساتھ ملاقات کی اور انہیں یقین دلایا کہ قاتل کو قرار واقعی سزادی جائے گی۔انہوں نے کہاکہ مصیبت کی اس گھڑی میں اہل خانہ کے ساتھ شبانہ بشانہ کھڑے ہیں۔