حکومت امیدواروں کو منصفانہ بھرتی کی یقین دہانی دلائے

جموں//
بھارتیہ جنتا پارٹی(بی جے پی) کے جموںکشمیر یونٹ کے صدر رویندر رینا کا کہنا ہے کہ حکومت کو چاہئے کہ وہ جموں کشمیر سروس سلیکشن بورڈ کی مختلف اسامیوں کے خواہشمندوں کو منصفانہ بھرتی کی یقین دہانی دلائے ۔
رینا نے کہا کہ میں نے اس سلسلے میں جے کے ایس ایس بی چیئرمین سے بات بھی کی ہے ۔ان کا کہنا تھا کہ ان بچوں کی بات سنی جانی چاہئے ۔
بی جے پی یونٹ صدر نے ان باتوں کا اظہار منگل کو یہاں نامہ نگاروں کے ساتھ بات کرنے کے دوران کیا۔
رینا نے کہا’’جموںکشمیر سروس سلیکشن بورڈ کے چیئر مین راجیش شرما جی سے میں نے بات کی ہے جو ہمارے نوجوانوں کے خدشات ہیں میں ان کو ٹھیک سمجھتا ہوں‘‘۔
بی جے پی یونٹ صدر کا کہنا تھا’’ آج خود لیفٹیننٹ گورنر صاحب نے کہا کہ چونکہ امتحانات کے لئے بچوں کو ایڈمٹ کارڈ بھیجے گئے ہیں اگر یہ عمل روکا گیا تو اس سے کہیں تین چار مہینوں کیلئے بھرتی کا عمل پھر رک نہ جائے ‘‘۔
رینانے کہا کہ ہمارے بچوں کی بات بھی سنی جانی چاہئے اور انہیں یہ یقین دلایا جانا چاہئے کہ اس معاملے میں کہیں بھی کسی قسم کی چور بازاری نہیں ہوگی۔انہوں نے کہا کہ کسی بھی رشوت خور کو نہیں بخشا جائے گا جو ایسا کرے گا اس کو جیل بھیج دیا جائے گا۔
بتادیں کہ جے کے ایس ایس بی کے امتحانات ایپ ٹیک کے ذریعے منعقد کرانے کے خلاف مختلف اسامیوں کے امید وار بر سر احتجاج ہیں۔