پونے : قصبہ پیٹھ سیٹ ضمنی انتخاب کے لیے پولنگ مواد تقسیم

پونے// مہاراشٹر میں قصبہ پیٹھ اسمبلی ضمنی انتخاب کے لئے انتخابی مشینری تیار ہے اور پولنگ مواد گنیش کلا کریڑا منچ، سورگیٹ میں انتخابی ریٹرننگ آفیسر اسنیہا کسوے دیوکٹے اور ڈپٹی کلکٹر سنجے تیلی کی رہنمائی میں تقسیم کیا گیا۔
قصبہ پیٹھ اسمبلی حلقہ میں اتوار کو پولنگ ہوگی۔ اس حلقے میں کل دو لاکھ 75 ہزار 679 ووٹرز ہیں اور 270 پولنگ اسٹیشنز پر پولنگ ہوگی۔
26 فروری کو ہونے والی پولنگ کے عمل کے لیے ایک ہزار 250 افسران و ملازمین کو تعینات کیا گیا ہے ۔ الیکشن آفس نے بتایا کہ پولنگ میٹریل 27 میزوں پر پر تقسیم کیا گیا۔
میٹریل کی تقسیم سے قبل ملازمین کو مقررہ فارم میں معلومات درج کرتے وقت کی جانیوالی احتیاطی تدابیر، ای وی ایم مشین میں تکنیکی خرابی کو کیسے دور کیا جائے ، مواد کو قبول کرنے اور جمع کرنے میں برتی جانے والی احتیاطی تدابیر کے بارے میں بتایا گیا۔ غیر حاضر عملے کو تبدیل کرنے کے لیے 27 ٹیموں کو ریزرو میں رکھا گیا ہے ۔ پولنگ کے دن پولیس کی نفری بڑھا دی گئی ہے اور سسٹم تیار ہے ۔ اس کام میں 600 پولیس اہلکار اور 83 افسران کو تعینات کیا گیا ہے ۔
پولنگ کا مواد عملے کے حوالے کرنے کے بعد مقررہ پولنگ اسٹیشن تک پہنچنے کے لیے ٹرانسپورٹ کی سہولت فراہم کی گئی ہے اور اس کے لیے پی ایم پی ایم ایل کی 43 بسیں، 7 منی بسیں اور 10 جیپوں کا انتظام کیا گیا ہے ۔ ملازمین کی سہولت کے لیے سامان کی تقسیم کے مقام پر ٹرانسپورٹ کے انتظامات کی تفصیلات کاغذوں پر رکھ دی گئیں۔
الیکشن کے لیے تعینات کیے گئے ملازمین میں سے 54 قصبہ پیٹھ حلقہ کے ووٹر ہیں۔ ان کے لیے موادکی تقسیم کے مقامات پر پوسٹل بیلٹ کی سہولت فراہم کی گئی ہے ۔ ڈسٹرکٹ انفارمیشن آفس (ڈی آئی او) نے بتایا کہ پہلی اور دوسری ٹریننگ کے دوران ان 54 ملازمین کو پوسٹل ووٹنگ کے لیے درخواست فارم دیے گئے تھے ۔