سرینگر/19فروری
جموں کشمیر انتظامیہ نے تمام سرکاری ملازمین کو انتباہ دیا ہے کہ وہ سرکار کی پالیسیوں اور فیصلوں سے متعلق سوشل میڈیا پر تنقید نہ کریں۔ ”اگر ایسا کیا جاتا ہے تو ایسے سرکاری ملازمین کے خلاف سروس رولز کے مطابق کارروائی کی جائے گی“۔
جمعہ کو چیف سیکرٹری ڈاکٹر ارون کمار مہتا کی صدارت میں تمام ضلع مجسٹریٹز اور متعلقہ افسران کے ساتھ ایک میٹنگ منعقد کی گئی ہے جس میں چیف سیکرٹری نے کہا ہے کہ بہت سے سرکار ملازمین انتظامیہ کی پالیسیوں اور فیصلوں کے تعلق سے سوشل میڈیا پر تنقید کررہے ہیں۔ انہوں نے تمام محکموں کے انتظامی سیکرٹری کو ہدایت دی ہے کہ وہ سوشل میڈیا کی نگرانی کرے اور ان ملازمین کی نشاندہی کرے جو سرکاری کی تنقید کررہے ہیں۔
داکٹر مہتا نے ان افسران کو ہدایت دی کہ ایسے ملازمین کو نوٹس جاری کی جائے اور جنرل ایڈمنسٹریشن ڈیپارٹمنٹ کو اس کے متعلق آگاہ کرے۔
بتایا جاتا ہے کہ جنرل ایڈمنسٹریشن ڈیپارٹمنٹ کو ہدایت دی گئی ہے کہ وہ سرکاری ملازمین کو سوشل میڈیا کے استعمال کرنے کےلئے ایک پالیسی واضح کرے۔
چیف سیکرٹری کی اس ہدایت کے بعد ضلع مجسٹریٹز نے حکمنانے جاری کئے۔ ضلع رامبن کے مجسٹریٹ مسرت الاسلام نے ضلع کے متعلقہ اور سیکٹورل افسران کے نام ایک ہدایت جاری کی ہے جس میں انکو بتایا گیا ہے کہ وہ ملازمین کو چیف سیکرٹری کی ہدایات کے بارے میں تنبیہ کرے اور سوشل میڈیا پر سرکار کو تنقید کرنے سے اجتناب کرے۔
واضح رہے کہ دفعہ 370 کی منسوخی کے بعد جموں کشمیر انتظامیہ نے اپنے ملازمین پر شکنجہ کس لیا ہے۔ کئی ملازمین کو عسکریت پسندی کے ساتھ منسلک ہونے یا اسکی معاونت کرنے پر نوکری سے برخواست کیا ہے۔