دسویں سے بارہمویں جماعت کے سالانہ امتحانات کے ڈیٹ شیٹ جاری

سرینگر//
جے کے بورڈ آف اسکول ایجوکیشن (بی او ایس ای) نے جمعہ کو جموں اور کشمیر کے نرم زون علاقوں میں پڑنے والے اسکولوں کیلئے ۱۰ویں سے ۱۲ویں جماعت کے طلباء کے سالانہ (ریگولر۲۰۲۳) امتحان کے ڈیٹ شیٹ کو جاری کیا۔
بی او ایس ای کے ڈائریکٹر اکیڈمکس کی طرف سے جاری کردہ ڈیٹ شیٹ کے مطابق، نرم زون والے علاقوں میں۱۰ویں جماعت کے طلباء کا امتحان۹مارچ۲۰۲۳ سے شروع ہوگا اور۵؍ اپریل کو اختتام پذیر ہوگا۔
اسی طرح، سافٹ زون کے علاقوں میں ۱۱ویں جماعت کے طلباء کے امتحانات۶ مارچ ۲۰۲۳ سے شروع ہوں گے اور ۱۹؍ اپریل کو اختتام پذیر ہوں گے۔
نیز،۱۲ویں جماعت کے طلباء کا امتحان ۸ مارچ سے شروع ہوگا اور ۲؍ اپریل ۲۰۲۳ کو اختتام پذیر ہوگا۔
قابل ذکر بات یہ ہے کہ جموں کشمیر حکومت کی طرف سے قومی تعلیمی کیلنڈر اور قومی تعلیمی پالیسی (این ای پی)۲۰۲۰ کے نفاذ کے بعد مارچ کے مہینے میں منعقد ہونے والا یہ پہلا بورڈ امتحان ہوگا۔
جیسا کہ پہلے ہی اطلاع دی گئی ہے، جے کے بورڈ نے جموں و کشمیر ڈویڑن کے نرم اور سخت زون والے علاقوں کو پہلے ہی نوٹیفائی کر دیا ہے۔
بورڈ کے اعداد و شمار کے مطابق، تقریباً ۴۴۴ اسکول‘ جموں میں ۳۰۹ اور کشمیر ڈویڑن میں ۱۳۵ اسکول ہارڈ زون میں آتے ہیں جبکہ ضلع کرگل کے سات زون اور پورے لداخ کے علاقے ہارڈ زون میں آتے ہیں۔
کشمیر ڈویڑن میں اننت ناگ کے ۴۳، بانڈی پورہ کے ۱۹، کپواڑہ کے ۳۲، کولگام کے ۲۸؍ اور بڈگام کے ۱۳؍ اسکول ہارڈ زون میں آتے ہیں۔
جموں ڈویڑن میں کشتواڑ کے ۵۰، ریاسی کے۴۷، راجوری کے۷، پونچھ کے۲۰، ڈوڈہ کے۵۶، رامبن کے۶۴؍ اور ادھم پور کے۶۵؍ اسکول ہارڈ زون میں آتے ہیں۔
ہارڈ زون والے علاقوں میں طلباء کا امتحان اپریل ۲۰۲۳ سے شروع ہونے والا ہے۔