نہیں صاحب ایسا نہیں ہے اور… اور بالکل بھی نہیں ہے کہ ہم اچانک سے راہل بابا کے فین ہو گئے ہیں…مداح ہو گئے ہیں… یقین کیجئے کہ ایسا نہیں ہے اور بالکل بھی نہیں ہے ۔ ہم مانتے ہیں کہ راہل بابا کی بھارت جوڑو یاترا ایک زبردست سیاسی فیصلہ تھا… جس کوپذیرائی بھی ملی‘ لیکن… لیکن اگر آپ سمجھتے ہیں کہ تین چار ہزار کلومیٹر کی مسافت طے کرکے راہل بابا ہمارے قریب آگئے ہیں … تو صاحب ایسا نہیں ہے اور… اور بالکل بھی نہیں ہے ۔ اور یہ بھی سچ ہے کہ ہم آج راہل بابا اور نہ ان کی حالیہ بھارت جوڑو یاترا کے بارے میں کچھ کہنے جا رہے ہیں… ہم کچھ اور کہنا چاہتے ہیں … کیا اس کا تعلق بھارت جوڑو یاترا کے ساتھ ہے ہم نہیں جانتے ہیں اور… اور بالکل بھی نہیں جانتے ہیں ۔ہم نے مودی جی اور ان کی تقاریر کو گزشتہ ۹ برسوں سے دیکھا اور سنا ہے… اس میںا ن کا کوئی ثانی نہیں ہے… ویسے بھی بہت ساری باتوں میں یہ جناب اپنی مثال آپ ہیں… صدر کی تقریر پر بحث کے جواب میں مودی جی کی لوک سبھااور راجیہ سبھا میں کی گئیں تقاریر بھی ہم نے سنیں اور… اور سن کر ہمیں کچھ لگا ‘ کچھ محسوس ہوا ۔اور اس لئے محسوس ہوا کہ مودی جی بار بار کانگریس کو نشانہ بنا رہے تھے… کانگریس سے زیادہ راہل بابا کے خاندان کو نشانہ بنا رہے تھے… انہیں طعنہ دے رہے تھے کہ انہوں نے اپنے طویل دور اقتدار میں نہرو کا نام گمنام کیوں رکھا اور…اور گاندھی نام کا استعمال زیادہ کیوں کیا … یقینا ملک میںبہت سارے مسائل ہیں… سلگتے مسائل ‘سنجیدہ مسائل‘پیچیدہ مسائل …جن کی اپوزیشن جماعتیں نشاندہی کرتی آئی ہیں… یقینا مودی جی نے ان کے بارے میں بھی بات کی… لیکن… لیکن باتوں باتوں میں یہ وزیر اعظم صاحب واپس نہرو گاندھی خاندان پر لوٹ آتے تھے … کیوں آتے تھے‘ کیوں انہوں نے کانگریس سے بھی زیادہ نہرو گاندھی خاندان کو تنقید کا نشانہ بنایا … زیادہ تنقید کا نشانہ بنایا … ہم نہیں جانتے ہیں اور… اور بالکل بھی نہیں جانتے ہیں … لیکن… لیکن نہ جانے کیوں مودی جی کی لوک سبھا اور راجیہ سبھا میں کی گئیں تقاریر کو راہل بابا کی بھارت جوڑو یاترا‘ اس کو لوگوں کی طرف سے ملنے والی حمایت ‘ اس سے پیدا ہونے والے جوش و خروش کے ساتھ جوڑنے کا جی کر تا ہے اور… اور سو فیصد کرتا ہے ۔ ہے نا؟