منتخب حکومت کاکوئی متبادل نہیں ہوتا ہے:الطاف بخاری

جموں//
ایل جی انتظامیہ پر تنقید کرتے ہوئے اپنی پارٹی کے صدر ‘الطاف بخاری نے کہا ہے کہ منتخبہ حکومت کا کوئی متبادل نہیں ہوتا ہے ۔
بخاری نے گاندھی نگر جموںپارٹی دفتر پر منعقدہ ایک پروگرام ‘جس دوران بھدرواہ سے کثیر تعداد میں لوگوں نے پارٹی میں شمولیت اختیار کی‘ کے موقع پر کہا کہ جموںکشمیر کے سبھی خطوں میں یکساں ترقی تبھی ممکن ہے جب بیروکریٹک راج کی جگہ منتخب حکومت ہوگی۔ انہوںنے کہا کہ بیروکریسی لوگوں کے سامنے جوابدہ نہیں ہوتی جبکہ منتخب حکومت کی لوگوں کے سامنے جوابدہی ہوتی ہے۔
بخاری نے کہاکہ جمہوری طور منتخب حکومت اِس قابل ہوتی ہے کہ وہ عوامی بہبود اسکیموں کی عمل آوری اور ترقی کو یقینی بنانے کیلئے بیروکریسی کو چلائے۔ جموں وکشمیر کے دور دراز گاؤں میں بلاکسی امتیاز ترقی ہو۔
اپنی پارٹی کے صدر نے افسوس ظاہر کرتے ہوئے کہا ’’لوگوں کا ایل جی انتظامیہ سے مکمل طور اعتماد اْٹھ چکا ہے۔ لہٰذا لوگوں کے اعتماد کی بحالی کے لئے اسمبلی انتخابات اور ریاستی درجے کی بحالی لازمی ہے‘‘۔انہوں نے کہا’’ہمارا ماننا ہے کہ سبھی خطوں کے لوگوں کے ساتھ بلا امتیاز رنگ ونسل، ذات پات یکساں سلوک ہونا چاہئے۔ ہمارا مقصد سماج میں یکساں ترقی، امن اور خوشحالی اور جموں وکشمیر میں امن اور خوشحالی کیلئے دونوں خطوں کے لوگوں کو ایکساتھ لانا ہے‘‘۔
بڑھتی مہنگائی، ترقی کے فقدان، تعلیمی وصحت ڈھانچہ کی خستہ حالی کا تذکرہ کرتے ہوئے بخاری نے کہا’’جموں وکشمیر میں تب خوشحالی آسکتی ہے جب دونوں خطوں کے لوگوں کو یکساں طور طریقہ دیکھاجائے اور اْنہیں پر امن ماحول فراہم کیاجائے۔اپنی پارٹی لوگوں کو سچ بتانے پر یقین رکھتی ہے، ہم عوامی بہبود کے وعدہ بند ہیں اور ہمارا مقصد جموں وکشمیر کو متحد رکھنا ہے۔‘‘
بخاری نے کہا کہ انتظامیہ وادی چناب میں بنیادی سہولیات فراہم کرنے میں ناکام رہی ہے۔ان کاکہنا تھا’’ خطہ کے دور دراز علاقوں میں رابطہ سڑک ، پینے کاصاف پانی اور بجلی کی بلاخلل سپلائی ایک دیرینہ خواب ہے۔ غیر اعلانیہ طویل بجلی کٹوتی نے لوگوں کی مشکلات میں مزید اضافہ کر دیا ہے لیکن انتظامیہ اِس طرف کوئی توجہ نہیں دے رہی‘‘۔
نئے ساتھیوں کا پارٹی میں خیر مقدم کرتے ہوئے بخاری نے اْمیدظاہر کی کہ اِس سے بھدرواہ میں پارٹی کو مضبوطی ملے گی۔اس دوران لوگوں نے بھدرواہ اور ضلع ڈوڈہ کے دیگر علاقوں کے عوامی وترقیاتی مسائل کو بخاری کی نوٹس میں لیا جنہوں نے بغور اْنہیں سنْا اور عوامی مسائل کے حل کیلئے ہرممکن تعاون کی یقین دہانی کرائی۔
اپنی پارٹی کے سربراہ نے تندہی سے کام کرنے پر پارٹی لیڈروں اور ورکروں کی تعریف کی اور کہاکہ ورکروں کی کارکردگی سے متاثر ہوکر جموں صوبہ کے اندر لوگ جوق درجوق اپنی پارٹی میں شامل ہورہے ہیں۔
اس موقع پر بخاری نے اعلان کیاکہ اپنی پارٹی لیڈر انیل کمار پارٹی ضلع صدر ڈوڈہ ہوں گے تاکہ زمینی سطح پر تنظیمی ڈھانچہ کو مضبوط کیاجائے۔