’سرحدوں پرجارحیت کا منہ توڑ جواب دینے کیلئے تیار‘

سرینگر//
فوج کی شمالی کمان کے جنرل آفیسر کمانڈنگ ان چیف‘ لیفٹیننٹ جنرل اوپندرا دیویدی کا کہنا ہے کہ فوج لداخ میں حقیقی کنٹرول لائن پر چین کی طرف سے کسی بھی جارحانہ عمل کا موثر جواب دینے کیلئے تیار ہے ۔
دیویدی نے کہا کہ لائن آف ایکچول کنٹرول (ایل اے سی) کی صورتحال کو سفارتکاری اور آپریشنل سطحوں پر حل کرنے کیلئے بھی بہ یک وقت اقدام جاری ہیں۔
شمالی کمان کے سربراہ نے ان باتوں کا اظہار منگل کے روز یہاں بادامی باغ میں ایک تقریب سے خطاب کے دوران کیا۔
لیفٹیننٹ جنرل دیویدی نے کہا’’ہندوستانی مسلح فوج کا ایل اے سی پر چین کی طرف سے جمود یکطرفہ طور پر تبدیل کرنے کی کوششوں کا جواب تیز، بے خوف اور ہم آہنگی سے بھر پور تھا‘‘۔ان کا کہنا تھا’’کسی بھی جارحانہ ڈیزائن یا کوششوں کا یقینی طور پر فورسز کی مناسب پوزیشننگ اور تینوں سروسز کے درمیان مکمل ہم آہنگی کے ساتھ مضبوط ارادے کے ساتھ جواب دیا جائے گا‘‘۔
شمالی کمان کے سربراہ نے کہا کہ لائن آف ایکچول کنٹرول (ایل اے سی) کی صورتحال کو سفارتکاری اور آپریشنل سطحوں پر حل کرنے کیلئے بھی بہ یک وقت اقدام جاری ہیں۔انہوں نے کہا’’میں آپ کو یقین دلاتا ہوں کہ مشرقی لداخ میں ایل اے سی پر فزیکل گشت اور تکنیکی ذرائع سے غلبہ حاصل کیا جا رہا ہے اور علاقائی سالمیت کو یقینی بنایا جا رہا ہے ‘‘۔ان کا کہنا تھا’’دو طرفہ تعلقات میں پیش رفت کو یقینی بنانے کیلئے امن وسکون کی بحالی کیلئے ہماری مسلسل کوششیں جاری ہیں اور جاری رہیں گی‘‘۔
لیفٹیننٹ جنرل نے کہا کہ شمالی کمان مسلسل بڑھتے ہوئے خطرات اور چلینجز کا مقابلہ کرنے کیلئے تیار ہے اور ہمارے حوصلے بھی بلند ہیں۔انہوں نے کہا’’جموں و کشمیر اور لداخ یونین ٹریٹریوں میں سیکورٹی صورتحال خطے اور آپریشنل کارروائیوں میں بہت سے چلینجز کا سامنا کرتی ہے قوم کے جمہوری اقدار کو بر قرار رکھتے ہوئے ہم ملک کی خود مختاری اور علاقائی سالمیت کے دفاع کیلئے پر عزم ہیں‘‘۔
فوجی کمانڈر کا کہنا تھا کہ قومی مفادات کے دفاع کے لئے تمام تر ضروری اقدام کریں گے اور اس کے لئے ہم مسلسل نگرانی کر رہے ہیں اور تمام پیش رفت پر کڑی نظر رکھے ہوئے ہیں۔انہوںنے کہا کہ بھارتی فوج مستقبل میں بھی کسی بھی چلینج کا مقابلہ کرنے کے لئے تیار ہے اور خطے کے لوگوں کی بہتری کے لئے ہمیشہ کام کرے گی۔
لیفٹیننٹ جنرل دیویدی نے کہا کہ دفعہ۳۷۰کی تنسیخ، گلوان وادی تنازعے اور کورونا کی لہروں کے تناظر میں گذشتہ دو برسوں کے دوران نئے چلینجز ابھر کر سامنے آئے ہیں۔ان کا کہنا تھا’’تاہم ان چلینجوں سے ہمارے حوصلے اور ثابت قدمی مزید مستحکم ہوئے ہیں‘‘۔
شمالی کمان کے سربراہ نے کہا کہ لائن آف کنٹرول پر صورتحال مستحکم ہے ۔انہوں نے کہا کہ در اندازی کی کسی بھی کوشش کو ناکام بنانے کیلئے سرحد پر انتہائی نگرانی رکھی جا رہی ہے اور مضبوط ٹیکنالوجی کے ساتھ ملٹی ٹائرڈ در اندازی مخالف گرڈ قائم کیا گیا ہے ۔
لیفٹیننٹ جنرل دیویدی کا کہنا تھا کہ دشمن کی طرف سے دراندازی کی کوششیں کرنے‘جنگ بندی معاہدے کی خلاف ورزی کرنے کی کوششوں کا بھر پور جواب دیا جائے گا۔انہوں نے کہا کہ سال گذشتہ در اندازی کی کئی کوششوں کو ناکام بنا دیا گیا۔