سرینگر///
سرینگر میونسپل کارپوریشن (ایس ایم سی) نے ٹیلی کام سروس فراہم کرنے والوں کو زمین پر بے ترتیبی سے ڈالی گئی تاروں، لائینوں، کیبلز، جنکشن باکسز اور دیگر یوٹیلیٹیز کو ۱۵دنوں کے اندر ہٹانے کی ہدایت دی ہے ۔
ایس ایم سی کمشنر اطہر عامر خان کی طرف سے جاری ایک حکمنامے میں کہا گیا ہے کہ یہ دیکھا گیا کہ مختلف ٹیلی کام آپریٹرس‘انٹرنیٹ فراہم کرنے والوں اور کیبل نیٹ ورک آپریٹرس نے سرینگر میں سڑکوں ، گلی کوچوں میں کیبل، تار، او ایس سیز، جنکشن بوکسز اور دیگر یوٹیلیٹیز بے ترتیب اور بے ہنگم طریقے سے بچھائے ہیں۔
حکمنامے میں کہا گیا’’یہ کیبلز، تاریں، جنکشن بوکسز وغیرہ بجلی کے کھمبوں پر آویزاں ہیں بعض صورتوں میں کیبل کے پورے رول کھمبوں کے نیچے زمین پر جمع ہیں اور بعض صورتوں میں تار کے یہ رولز سڑکوں اور گلیوں میں بکھرے پڑے ہیں‘‘۔
ایس ایم سی نے کہا کہ بے ترتیبی سے ڈالے گئے یہ کیبلز، تاروں، یوٹیلیٹیز اور جنکشن بوکسز جہاں لوگوں کے جان و مال کیلئے خطرہ بن گئے ہیں وہیں شہر کی خوبصورتی کو بھی گھٹاتے ہیں۔انہوں کہا کہ مذکورہ آپریٹرس کو بار ہا ہدایت دی گئی کہ وہ ان چیزوں کو ترتیب اور اچھے سلیقے سے رکھیں لیکن وہ ایسا کرنے میں ناکام ہوئے ہیں۔
حکمنامے میں کہا گیا کہ مذکورہ آپریٹرس کو ان کیبلز، تاروں، جنکشن بوکسز اور دیگر یوٹیلیٹیز کو۱۵دنوں کے اندر زمین سے ہٹانے کا آخری موقع دیا جا رہا ہے ۔انہوں نے کہا کہ ایسا نہ کرنے کی صورت میں کارپوریشن خود یہ کام انجام دے گی جس کے خطرے اور نقصان کی ذمہ داری آپریٹرس پر عائد ہوگی۔