آئی سی سی ایوارڈز دیتے ہوئے نجم سیٹھی اور بابر اعظم کی دلچسپ گفتگو

کراچی//
چیئرمین پاکستان کرکٹ بورڈ (پی سی بی) مینجمٹ کمیٹی نجم سیٹھی اور بابراعظم کے درمیان آئی سی سی ٹرافی دینے کے دوران دلچسپ گفتگو ہوئی۔
اس موقع پر چیئرمین پی سی بی مینجمنٹ کمیٹی نجم سیٹھی نے کہا کہ 4 سال قبل ایک دوست نے کہا تھا کہ بابر اعظم نامی لڑکے کا خیال رکھنا، اُس دوست نے کہا تھا کہ یاد رکھنا وہ ایک عظیم بیٹر بنے گا۔
نجم سیٹھی نے کہا کہ وہ دن اور آج کا دن ہے، میں اس دوست کو داد دیتا ہوں۔
چیئرمین پی سی بی مینجمنٹ کمیٹی نے سوال کیا کہ بابر آپ اس عمر میں اپنے فیم کو کس طرح محسوس کرتے ہیں؟ جس پر بابر اعظم نے انہیں جواب دیا کہ میں صرف محنت کرتا ہوں۔ کوشش کرتا ہوں چیزوں کو آسان رکھوں۔
بابر اعظم کا کہنا تھا کہ اپنے مائنڈ سیٹ کو آسان اور فوکس رکھتا ہوں، جس کی وجہ سے کرکٹ آسان ہوجاتی ہے۔
نجم سیٹھی نے پوچھا کہ اتنی کم عمر میں اتنی زیادہ کامیابی پر فکر نہیں ہوتی کہ اگر کبھی آؤٹ آف فارم ہوئے تو کیا ہوگا؟ جس پر بابر اعظم نے کہا کہ میں ہر طرح کے حالات کے لیے خود کو تیار رکھتا ہوں۔
بابر اعظم کا کہنا تھا کہ جو آپ سوچتے ہیں یا کرنا چاہتے ہیں وہ کبھی کبھی نہیں ہوتا۔ جب آپ گرتے ہیں، آؤٹ آف فارم ہوتے ہیں تب سپورٹ چاہیے ہوتی ہے۔
اس موقع پر نجم سیٹھی کہتے ہیں کہ مجھے فخر محسوس ہو رہا ہے کہ میں آپ کو ٹرافی دے رہا ہوں، امید ہے یہ پہلی اور آخری ٹرافی نہیں ہوگی۔
بابر اعظم کے قد پر مذاحیہ تبصرہ کرتے ہوئے نجم سیٹھی کا کہنا تھا کہ بابر قد میں میرے سے لمبا ہے، یا میں چھوٹا ہو رہا ہوں؟ جس پر بابر نے دلچسپ جواب دیا کہ میرا قد 5 فٹ 10 انچ ہے اور جوتے بھی بڑے والے پہنے ہیں۔
نجم سیٹھی کہتے ہیں کہ اتنے سارے ایوارڈز جیتنے کے بعد کبھی ٹینشن نہیں ہوتی؟ جس پر بابر اعظم انہیں جواب دیتے ہیں کہ ٹینشن ہوتی ہے مگر اسے ہینڈل کرنا آنا چاہیے۔