ویرات کوہلی کی دھمکی 12 سال بعد بھی دھمکی ہی رہی

نئی دہلی//
بھارتی کرکٹ ٹیم کے اسٹار بیٹر ویرات کوہلی کی سوشل میڈیا پر ایک شخص کو دی گئی دھمکی محض دھمکی ہی رہ گئی۔
سوشل میڈیا پر 6 دسمبر 2011ء کو ویرات کوہلی نے ایک شخص کو پیغام لکھا تھا کہ اگر آپ گندی زبان استعمال کرنا چاہتے ہیں تو ٹوئٹ نہ کریں۔
ویرات کوہلی نے اُس شخص کو تنبیہ کی تھی کہ آپ کے اکاؤنٹ کو رپورٹ کردیا گیا ہے اور یہ جلد ہی بند کر دیا جائے گا۔
رپورٹس کے مطابق ایشان نامی اکاؤنٹ سے ٹوئٹر استعمال کرنے والے شخص نے ہر سال ویرات کوہلی کو ٹوئٹ کر کے یاد دلایا کہ آپ کی تنبیہ کا کوئی فائدہ نہیں ہوا اور میرا اکاؤنٹ اب بھی بحال ہے۔
سوشل میڈیا پر اس حوا لے سے سامنے آنے والی تصویر کے مطابق ایشان نامی اکاؤنٹ سے ویرات کوہلی کو 2012، 2016 اور 2017 میں ٹوئٹ کر کے لکھا گیا کہ میں 6 سال بعد بھی ٹوئٹر پر موجود ہوں۔
ویرات کوہلی کی جانب سے تنبیہ کیے جانے کے 12 سال بعد اس شخص نے بھارتی کرکٹر کو یاد دلایا کہ وہ اب بھی ٹوئٹر پر موجود ہے۔
ایشان نامی شخص نے آخری مرتبہ ویرات کوہلی کو 13 جنوری 2023 کو ٹوئٹ میں لکھا کہ 11 سال بعد بھی میرا اکاؤنٹ بند نہیں ہوا۔