حادثے کے بعد پنت نے پہلی بار ٹویٹ کیا

ممبئی// ہندوستانی وکٹ کیپر بلے باز رشبھ پنت نے سڑک حادثے میں بال بال بچنے کے بعد پیر کو پہلی بار ٹوئٹ کرتے ہوئے کہا کہ ان کے گھٹنے کی سرجری کامیاب رہی اور اب وہ ٹھیک ہو رہے ہیں۔
پنت نے ٹویٹ کیا، میں تمام حمایت اورنیک خواہشات کے لیے عاجز اور شکرگزار ہوں۔ مجھے آپ کو یہ بتاتے ہوئے خوشی ہو رہی ہے کہ میری سرجری کامیاب رہی۔ میری صحت یابی شروع ہو گئی ہے اور میں آنے والے چیلنجوں کے لیے تیار ہوں۔
پنت نے اس موقع پر بورڈ آف کنٹرول فار کرکٹ ان انڈیا (بی سی سی آئی)، سکریٹری جے شاہ اور انتظامیہ کی مدد کے لیے شکریہ ادا کیا۔
اپنے مداحوں کو مخاطب کرتے ہوئے، انہوں نے کہا، "اپنے دل کی گہرائیوں سے، میں اپنے تمام مداحوں، ٹیم کے ساتھیوں، ڈاکٹروں اور فزیوز کا بھی ان کے اچھے الفاظ اور حوصلہ افزائی کے لئے شکریہ ادا کرنا چاہوں گا۔ آپ سب کو میدان میں دیکھنے کا منتظر ہوں۔
قابل ذکر ہے کہ پنت 30 دسمبر 2022 کو دہلی سے روڑکی میں اپنے گھر جاتے ہوئے سڑک حادثے کا شکار ہو گئے تھے۔ اس حادثے میں اس کی جان بچ گئی، حالانکہ ان کے گھٹنے کے تینوں لیگامینٹ (وہ عضلات جو گوشت کو ہڈی سے جوڑتا ہے) پھٹ چکے تھے۔
حادثے کے بعد انہیں کچھ دنوں تک دہرادون کے میکس اسپتال میں رکھا گیا، جس کے بعد بی سی سی آئی نے انہیں ایئرلفٹ کرکے ممبئی کے کوکیلا بین دھیرو بھائی امبانی اسپتال پہنچایا۔ یہاں ڈاکٹر دنشا پاردی والا کی نگرانی میں ان کے گھٹنے کی سرجری ہوئی اور اب وہ صحت یابی کی طرف گامزن ہیں۔