ناراض شانتو نے بنگلہ دیش کی ٹیسٹ کپتانی چھوڑ دی

کولمبو// بنگلہ دیش کرکٹ ٹیم کے کپتان نجمل شانتو نے ہفتہ کو سری لنکا کے خلاف دو ٹیسٹ میچوں کی سیریز ہارنے کے بعد کپتانی سے استعفیٰ دے دیا۔ شانتو ،مہدی حسن کو ون ڈے ٹیم کا کپتان بنائے جانے سے ناراض چل رہے تھے۔
یہاں ایک پریس کانفرنس میں شانتو نے اپنے استعفیٰ کا اعلان کیا۔ سری لنکا کے خلاف کولمبو ٹیسٹ میں اننگز اور 78 رنز سے ہارنے کے بعد شانتو نے کہا، میں اب ٹیسٹ کی کپتانی جاری نہیں رکھوں گا۔”
انہوں نے کہا، "یہ میرا کوئی ذاتی معاملہ نہیں ہے۔ ٹیم کی بہتری کے لیے میں نے یہ فیصلہ کیا ہے، مجھے لگتا ہے کہ میرا یہ فیصلہ ٹیم کے مفاد میں ہوگا۔ پچھلے کئی سالوں سے میں اس ڈریسنگ روم کا حصہ ہوں اور میں سمجھتا ہوں کہ تین بین الاقوامی فارمیٹس میں الگ الگ کپتانوں کا ہونا ٹیم کے مفاد میں نہیں ہے۔ مجھے نہیں معلوم کہ بورڈ اس بارے میں کیا سوچتا ہے، لیکن میں ان کے فیصلے کا احترام کروں گا۔ یہ میرا ذاتی فیصلہ ہے، مجھے لگتا ہے کہ تین الگ الگ کپتان ٹیم کے لیے صحیح نہیں ہیں۔ میں چاہوں گا کہ اس فیصلے کو کوئی جذباتی طور پر نہ لیں، یا یہ نہ سوچے کہ میں نے مایوسی کی وجہ سے یہ کیا۔ میں ایک بار پھر واضح کرنا چاہتا ہوں کہ یہ میں نے ٹیم کی بھلائی کے لیے کیا ہے۔”
شانتو نے بنگلہ دیش کے 14 ٹیسٹ میچوں میں کپتانی کی ہے، جن میں سے انہیں نو ٹیسٹ میں شکست ہوئی جبکہ چار ٹیسٹ میچوں میں جیت حاصل کی۔انہوں نے کہا کہ چند دن پہلے ہی بنگلہ دیش کرکٹ بورڈ (بی سی بی) کے کرکٹ آپریشنز ڈیپارٹمنٹ نے بتایا تھا کہ ان سے ون ڈے کی کپتانی لے کر مہدی حسن کو یہ ذمہ داری سونپی گئی ہے۔