سرینگر///
نیشنل کانفرنس کے نائب صدر‘ عمر عبداللہ نے منگل کو کہا کہ انتخاب عوام کا حق ہے لیکن کشمیری جموں و کشمیر میں انتخابات کرانے کیلئے مرکز کے سامنے بھیک نہیں مانگیں گے۔
عمرعبداللہ نے منگل کو ضلع اننت ناگ میں نامہ نگاروں کو بتایا’’اگر اس سال انتخابات نہیں ہوئے، تو ایسا ہی سہی‘ ہم بھکاری نہیں ہیں۔ میں نے بار بار کہا ہے کہ کشمیری بھکاری نہیں ہیں۔ الیکشن ہمارا حق ہے لیکن ہم اس حق کے لیے ان سے بھیک نہیں مانگیں گے۔ وہ ہمارے لیے الیکشن بحال کرنا چاہتے ہیں، اچھا۔ لیکن اگر وہ یہ نہیں کرنا چاہتے ہیں، تو ایسا ہی سہی‘‘۔
جائیدادوں اور سرکاری زمینوں سے لوگوں کی بے دخلی کے بارے میں پوچھے جانے پر سابق وزیر اعلیٰ نے دعویٰ کیا کہ جموں و کشمیر میں انتخابات نہ ہونے کی ایک وجہ یہ ہے۔
عمرعبداللہ کاکہنا تھا’’اسی لیے وہ الیکشن نہیں کروا رہے ہیں۔ وہ لوگوں کو ’ہراساں‘ کرنا چاہتے ہیں۔ لوگوں کے زخموں پر مرہم رکھنے کے بجائے، وہ زخموں کو مزید بڑھانے کی سوچ رکھتے ہیں‘‘۔
سابق وزیر اعلیٰ نے کہا کہ بی جے پی حکومت جانتی ہے کہ ایک منتخب حکومت عوام کے زخموں پر مرہم رکھنے کی کوشش کرے گی جبکہ وہ صرف مبینہ طور پر ان میں نمک اور مرچ ڈالتی ہے۔
قبل ازیں عمر عبداللہ نے ضلع اننت ناگ کے شیر کشمیر کالونی کا دورہ کیا جہاں انہوں سابق وزیر پیر محمد حسین کی ہمشیرہ کی وفات پر ان کے اہل خانہ کے ساتھ تعذیت پرسی کے۔
مرحومہ جے کے پی سی کے جنرل سیکریٹری، پیر منصور حسین کی خالہ بھی تھی۔ عمر عبداللہ کے ہمراہ پارٹی لیڈر سید بشارت بخاری‘رفیع احمد میر، ممبر پارلیمنٹ حسنین مسعودی کے علاوہ کئی دیگر سیاسی لیڈران و کارکنان نے سوگوار کنبے کے ساتھ تعذیت کا اظہار کیا۔