پونچھ میں جزوی ہڑتال، لوگوں نے سڑکوں پر آکر احتجاج کیا

جموں//
جموںکشمیر کے راجوری ضلع کے ڈانگری گاوں میں مشتبہ ملی ٹینٹوں کے ہاتھوں عام شہریوں کی ہلاکت کے خلاف بدھ کے روز پونچھ کے بعض علاقوں میں ہڑتال سے معمولات زندگی ٹھپ ہو کر رہ گئی ۔
اطلاعات کے مطابق راجوری میں شہری ہلاکتوں کے خلاف خط پیرپنچال کے بعض علاقوں میں تیسرے روز بھی کاروباری ادارے ٹھپ ہو کررہ گئے ۔
معلوم ہوا ہے کہ بدھ کے روز پونچھ میں جزوی ہڑتال کے باعث سرکاری اور پرائیوٹ دفاتر بند رہے ۔
ذرائع نے بتایا کہ شہری ہلاکتوں کے خلاف لوگوں نے سڑکوں پر آکر احتجاجی مظاہرئے کئے اور پاکستانی ہلالی پرچموں کو نذر آتش کیا۔
مظاہرین نے بتایا کہ پاکستانی ملی ٹینٹوں نے راجوری میں عام شہریوں کا قتل کیا ۔اُن کے مطابق شہری ہلاکتوں میں ملوث ملی ٹینٹوں کو جلد ازجلد کیفر کردار تک پہنچانے کی ضرورت ہے ۔
دریں اثنا راجوری کے ڈانگری اور اس کے ملحقہ علاقوں میں تیسرے روز بھی ہڑتال سے معمولات زندگی ٹھپ ہو کر رہ گئی ۔معلوم ہوا ہے کہ کسی بھی ناخوشگوار واقعے کو ٹالنے کی خاطر راجوری میں جگہ جگہ سیکورٹی فورسز کی تعیناتی عمل میں لائی گئی ہے ۔