بھارت جوڑو یاترا کو اتر پردیش میں زبردست حمایت مل رہی ہے

نئی دہلی//کانگریس لیڈر راہل گاندھی کی قیادت میں جاری ‘بھارت جوڑو یاترا’ کو اتر پردیش میں زبردست عوامی حمایت مل رہی ہے اور لوگ مختلف جگہوں پر پھولوں کی بارش کے ساتھ یاتری ٹیم کا استقبال کر رہے ہیں۔
کانگریس نے کہا کہ اتر پردیش میں راشٹریہ لوک دل کے ساتھ ہی مختلف سیاسی، سماجی اور کسان تنظیموں کے ساتھ ساتھ مختلف پیشوں سے وابستہ لوگ بھی اس یاترا میں شامل ہو رہے ہیں۔ فوج میں بھرتی کی تیاری کرنے والے نوجوانوں نے بھی مسٹر گاندھی سے ملاقات کی اور اگنی ویر اسکیم پر تنقید کی۔
پارٹی لیڈروں کا کہنا ہے کہ جس طرح سے لوگ اتر پردیش میں یاترا میں شامل ہونے کے لیے پرجوش ہو رہے ہیں اس سے ثابت ہوتا ہے کہ ریاست میں کانگریس کی جڑیں 32 سال سے اقتدار میں نہ رہنے کے باوجود اب بھی بہت گہری ہیں۔ بھارت جوڑو 3 جنوری کو اتر پردیش پہنچی تو ایک بہت بڑے ہجوم نے دل کھول کریاترا کا خیرمقدم کیا اور اس کی حمایت کی۔ غازی آباد سے باغپت میں داخل ہوتے وقت راستے میں لوگوں نے پھولوں کی بارش کے ساتھ یاتراٹیم کا استقبال کیا۔
بھارت جوڑو یاترا 3 جنوری سے 5 جنوری تک اتر پردیش میں رہے گی اور پھر ہریانہ میں دوبارہ داخل ہو کر سری نگر کے لئے آگے بڑھے گی۔