ضلع اننت ناگ کے ڈانگر پورہ میں آتشزدگی

سرینگر/۳۰دسمبر
جنوبی کشمیر کے اننت ناگ کے ڈانگر پورہ علاقے میں دوران شب آگ کی ایک واردات میں کم سے کم۱۰رہائشی مکانات اورمتعدد دکانات خاکستر ہوگئے ۔
آگ کی اس واردات میں ارشد احمد حرہ نامی ایک فائر مین زخمی ہوگیا جس کو علاج و معالجے کیلئے ہسپتال منتقل کیا گیا جہاں اس کی حالت مستحکم بتائی جا رہی ہے ۔
محکمہ فائر اینڈ ایمر جنسی سروسز کشمیر کے جوائنٹ ڈائریکٹر‘ بشیر احمد شاہ نے یو این آئی کو بتایا کہ اننت ناگ کے ڈانگر پورہ علاقے کی انتہائی گنجان بستی میں دوران شب قریب تین بجے ایک رہائشی مکان میں آگ لگ گئی جس کے شعلوں نے چشم زدن میں متصل واقع مکانوں کو اپنی لپیٹ میں لے لیا۔
شاہ نے کہا کہ آگ کے دوران کئی گیس سلنڈروں کے دھماکے ہوئے جس سے آگ کے شعلے مزید تیز ہوگئے اور کافی زیادہ نقصان کا باعث بن گئے ۔ان کا کہنا تھا کہ آگ کی اس واردات میں کم سے کم دس مکان خاکستر ہوگئے اور کچھ دکانوں کو بھی نقصان پہنچا۔انہوں نے کہا کہ بیستر مکانوں کی بالائی منزلوں کو زیادہ نقصان پہنچا۔
جوائنٹ ڈائریکٹر نے کہا کہ آگ کی شدت کو دیکھ کر مختلف علاقوں کے فائر ٹنڈئس کی خدمات حاصل کی گئیں۔انہوں نے کہا کہ محکمے کی بر وقت کارروائیوں اور جائے واردات پر موجود کافی مقدار میں پانی دستیاب ہونے سے دو سو مکانوں کو راکھ کے ڈھیر میں تبدیل ہونے سے بچا لیا گیا۔
شاہ نے برف باری کے بیچ محکمے کے عملے کی لوگوں کی جانوں اور املاک کو بچانے کیلئے کی جانے والی کاوشوں کی سراہنا کی۔