ایل جی ملاقات :سنہا کا عوامی شکایات کا جائزہ

جموں//
لیفٹیننٹ گورنر‘ منوج سِنہا نے آج یہاں سول سیکرٹریٹ میں ’’ ایل جی ملاقات ‘‘ براہِ راست عوامی شکایات کی سماعت کے پروگرام میں لوگوں کی شکایات سنیں اور ان کے مناسب اَزالے کے لئے ہدایات جاری کیں۔
لیفٹیننٹ گورنر نے متعلقہ ترقیاتی کمشنروں ، اعلیٰ اَفسران سے جے کے گرام پورٹل پر موصول ہونے والی شکایات کی تفصیلات طلب کیں اور شفاف اور مؤثر اَنداز میں شکایات کا فوری اَزالہ کرنے کی ہدایت دی۔
ایک سرکاری بیان میں کہا گیا ہے کہ سنہا نے کہا ’’ لوگوں کی اُمنگوں کو پورا کرنے اور بروقت مسائل کو حل کرنے کیلئے شکایات کے اَزالے کے طریقہ کار کو ٹیکنالوجی کی مدد سے مسلسل اَپ گریڈ کیا جانا چاہیے۔ ہم بہت تسلی بخش نتائج حاصل کر رہے ہیں اور شہریوں کو مساوی طور پر آسانی سے ضروری خدمات فراہم کرنے کیلئے پوری لگن کے ساتھ کام کرنے کی ضرورت ہے ۔‘‘
لیفٹیننٹ گورنر نے تمام ایڈمنسٹریشن سیکریٹریوں اور ضلع ترقیاتی کمشنرں کو ہدایت دی کہ وہ اِس بات کو یقینی بنائیں کہ تمام آن لائن خدمات مؤثر طریقے سے چل رہی ہیں اور خدمات کے فوائد عام آدمی تک پہنچ رہے ہیں۔
سنہا نے کہا’’ ہمیں کسی بھی وقت کہیں بھی بغیر کسی رُکاوٹ کی معیاری خدمات فراہم کرنے کیلئے اِی گورننس کی صلاحیت کو بروئے کار لانا چاہیے۔سینئر اَفسران کو بھی چاہیے کہ وہ شکایات کے بروقت نمٹانے کو یقینی بنائیںاور نوڈل اَفسران شکایات کے نمٹانے کی سختی سے نگرانی کریں ۔‘‘
لیفٹیننٹ گورنر نے بانڈی پورہ کے یاور محی الدین کی ان کے بیٹے کے حق میں تعلیمی اِمداد کی منظوری سے متعلق شکایت پر سکول او راعلیٰ تعلیم محکموں کو ہدایت دی کہ وہ اِس بات کو یقینی بنائیں کہ کوئی بھی اہل اِستفادہ کنندہ تعلیمی اِمداد کے فوائد سے محروم نہ رہے۔
سنہا نے ڈوڈہ کے گاؤں ترانکھل میں سکول کی نامکمل عمارت سے متعلق ڈوڈہ سے تعلق رکھنے والے سفیان احمد کی شکایت کو دور کرتے ہوئے متعلقہ ضلع ترقیاتی کمشنر کو ہدایت دی کہ باقی ماندہ کام کو مقررہ مدت میں مکمل کیا جائے ۔
ٹرانسفارمر وں کی تنصیب کے حوالے سے گلاد مینڈھر پونچھ کے بشیر احمد کی شکایات پر ضلع ترقیاتی کمشنر پونچھ کو اِس مسئلے کو فوری حل کرنے کی ہدایت دی گئی۔
لیفٹیننٹ گورنر نے کہا’’ حکومتی سکیموں او رمحکموں کو شہریوں کو درکا ر تمام خدمات بغیر کسی رُکاوٹ اور پریشانی کے فراہم کرنے کیلئے جواب دہ ہونا چاہیے۔‘‘
سیکریٹری عوامی شکایات‘ ریحانہ بتول نے چیئر کو جے کے ۔ آئی جی آر اے ایم ایس پر موصول ہونے والی شکایات کی پیش رفت اور صورتحال کے بارے میںجانکاری دی۔
بات چیت پروگرام کے دوران چیف سیکرٹری ڈاکٹرارون کمار مہتا ، ایڈیشنل چیف سیکرٹری محکمہ زرعی پیداوار اَتل ڈولو ، ایڈیشنل چیف سیکرٹری محکمہ داخلہ آر کے گوئیل ، اِنتظامی سیکرٹریز ،صوبائی کمشنران ، ضلع ترقیاتی کمشنروں ، ایس ایس پیز ، سربراہان اور دیگر سینئر اَفسران ذاتی طور پر او رعملی طور پر موجود تھے۔