سرینگر//(آئی اے این ایس)
کرسمس اور نئے سال سے پہلے وادی میں سیاحوں کا ہجوم جمع ہونا شروع ہو گیا ہے اور زیادہ تر ہوٹلوں نے مکمل بکنگ کروا رکھی ہے۔
مشہور سیاحتی مقام گلمرگ کے تمام ہوٹلوں کی پیشگی بکنگ ہو چکی ہے۔
سال۲۰۲۲ کشمیر کیلئے سیاحت کے لحاظ سے اچھا سال رہا ہے۔ سرکاری اعداد و شمار کے مطابق نومبر کے آخر تک۲۰ لاکھ سے زائد سیاحوں نے وادی کا دورہ کیا۔
ٹریول ایجنٹس ایسوسی ایشن آف کشمیر کے صدر‘ فاروق احمد کٹھو کے مطابق گزشتہ دو ہفتوں سے کرسمس تہوار اور نئے سال کی آمد کی وجہ سے سیاحوں کی آمد میں اضافہ ہوا ہے۔ گلمرگ اور پہلگام کے ہوٹل کرسمس اور نئے سال کیلئے سو فیصد بک ہوئے ہیں۔
کشمیر ہمیشہ کرسمس اور نئے سال کے دوران سیاحوں سے بھرا رہتا ہے اور یہ اس بات کا اشارہ ہے کہ اس بار بھی بڑی تعداد میں سیاح وادی کا رخ کریں گے، اور ہوٹل مالکان سیاحوں کو اپنی طرف متوجہ کرنے کے موقع سے فائدہ اٹھا رہے ہیں۔ ہوٹل مالکان نے گالا ڈنر اور دیگر تفریح کے لیے خصوصی پیکیجوں کا اعلان بھی کیا ہے۔
گزشتہ دو سالوں میں کورونا وائرس کی عالمی وبا کی وجہ سے بین الاقوامی سیاحت کی تمام سرگرمیاں معطل تھیں۔ لیکن اب یہ تمام پابندیاں ختم ہو چکی ہیں جس کی وجہ سے سیاحت سے وابستہ لوگوں میں خوشی کی لہر دوڑ گئی ہے۔
جموں کشمیر حکومت کے محکمہ سیاحت نے سیاحوں کو راغب کرنے کے لیے گلمرگ اور پہلگام میں کرسمس اور نئے سال کی تقریبات کا بھی منصوبہ بنایا ہے۔
ڈائریکٹر ٹورازم فضل الحسیب نے کہا کہ محکمہ ۲۵ دسمبر کو گلمرگ اور پہلگام میں ونٹر کارنیول اور نئے سال کا جشن منائے گا۔دودھ پتھری اور یوسمرگ میں بھی تقریبات منعقد کی جائیں گی۔