یو آئی ڈی :’لوگوں کواعتماد میں لیں گے‘

جموں//
جموںکشمیر کے لیفٹیننٹ گورنر‘ منوج سنہا نے پیر کے روز کہاکہ یوٹی کے لوگوں کو ایک یونیک آئی ڈی(یو آئی دی) فراہم کیا جائے گا۔انہوں نے کہاکہ آئی ڈی کی تیاری کا مقصد سوشل سیکورٹی فراہم کرنا ہے۔
ان باتوں کا اظہار ایل جی منوج سنہا نے جموں میں نامہ نگاروں سے بات چیت کے دوران کیا۔
سنہا نے کہاکہ جموں وکشمیر کے لوگوں کو ایک آئی ڈی نمبر فراہم کیا جائے گا جس سے لوگوں کو مختلف اسکیموں سے استفادہ کرنے میں آسانی ہوگی۔انہوں نے مزید بتایا کہ اس حوالے سے کسی کو غلط فہمی کا شکار نہیں ہونا چاہئے کیونکہ اہل خانہ کو بھی اس سلسلے میں اعتماد میں لیا جائے گا۔
لیفٹیننٹ گورنر منوج سنہا نے کہا کہ اس یونیک آئی ڈی کا فائدہ یہ ہوگا کہ سب کچھ ایک ہی جگہ پر درج ہوگا جبکہ پنشن اور دوسری اسکیموں سے لوگوں کو سیدھے طورپر فائدہ ملے گا۔
سنہا نے کہاکہ یہاں کیا ہوتا تھا کہ الگ الگ اسکیموں کیلئے الگ سے قواعد و ضوابط پورے کئے جاتے اس یونیک آئی ڈی سے لوگوں کو آسانی ملے گی۔اْن کے مطابق یونیک آئی ڈی سے شفافیت کو بھی یقینی بنایا جائے گا۔
کشمیری پنڈتوں کے بارے میں پوچھے گئے سوال کے جواب میں ایل جی سنہا نے کہا’’میں نے اْن سے کئی دفعہ بات چیت کی اور اْن کے مسائل جن میں پرموشن اور محفوظ مقامات پر تعیناتی قابل ذکر ہیں کو پورا کیا گیا۔‘
لیفٹیننٹ گورنر نے کہا’’ صرف کشمیری پنڈتوں کیلئے ہی نہیں بلکہ میرے دروازے سب کیلئے کھلے ہیں جو بھی بات چیت کیلئے آنا چاہتا ہے بلا جھجک مجھ سے کسی بھی مسئلے پر بات چیت کر سکتا ہے۔‘‘
کشمیر میں بجلی کے بحران کے بارے میں پوچھے گئے سوال کے جواب میں ایل جی منوج سنہا نے کہاکہ یہ بالکل من گھڑت ہے کیونکہ صوبے کشمیر میں لوگوں کو بلاخلل بجلی فراہم کی جارہی ہے۔انہوں نے کہاکہ کشمیر میں بجلی کا کوئی بحران نہیں او راس حوالے سے پھیلائی جارہی افواہیں حقیقت سے کوسوں دور ہیں۔
سنہاکے مطابق کشمیر میں یومیہ کتنی بجلی صارفین کو فراہم کی جاتی ہے اس حوالے سے ہمارے پاس ایک ڈیٹا موجود رہتا ہے لہذا یہ کہنا کہ کشمیر میں بجلی کا بحران ہے حقیقت سے بعید ہے۔
بتادیں کہ منفر د آئی ڈی پر بھاجپا کو چھوڑ کر سبھی سیاسی پارٹیوں نے تحفظات کا اظہار کرتے ہوئے حکومت سے اس معاملے پر وضاحت کرنے کو کہا ہے۔