ایس آئی یو نے۱۳ملزمان کے خلاف چارج شیٹ دائر کیا

سرینگر//
سپیشل تحقیقاتی ایجنسی (ایس آئی یو) نے جمعے کے روز سرینگر کی ایک عدالت میں۱۳ملزمان کے خلاف چارج شیٹ پیش کیا۔
پولیس کے ایک ترجمان نے بتایاکہ پارمپورہ پولیس تھانے میں درج کیس زیر نمبر ۱۲۷کے سلسلے میں ۲۸مئی۲۰۲۲کو مصدقہ اطلاع موصول ہونے کے بعد سیکورٹی فورسز نے برتھنہ قمر واری میں کئی رہائشی مکانوں کی تلاشی لی جس دوران چھ افراد کو حراست میں لیا گیا اور بعد میں ایک سرگرم ملی ٹینٹ شارق وانی کی بھی گرفتاری عمل میں لائی گئی۔
ترجمان نے بتایا کہ مزید تین ملزمان (سرگرم ملی ٹینٹ) جو اس کیس میں پولیس کو مطلوب تھے مختلف تصادم آرائیوں کے دوران مارے گئے جبکہ اس کیس میں مزید تین ملی ٹینٹ جن کی شناخت باسط ، مومن اور اومیس کے بطور ہوئی ہے پولیس کو مطلوب ہے اور تینوں ٹی آر ایف سے وابستہ ہیں۔
پولیس ترجمان کے مطابق تحقیقات کے دوران یہ بات منکشف ہوئی کہ ملزمان نے سرگرم ملی ٹینٹ کے ساتھ روابط استوار کر رکھے تھے اور مجرمانہ سازش کے تحت انہوں نے ملی ٹینٹوں کے ساتھ مل کر سرینگر ضلع میں دہشت گردانہ سرگرمیوں کو انجام دینے کی سازش کی تھی۔
یہاں یہ بات غور طلب ہے کہ مذکورہ دہشت گردوں کو رہائشی مکانات میں پناہ دی گئی تھی۔ یو اے پی اے ایکٹ کی دفعہ۲۵کے تحت تخریبی سرگرمیوں کیلئے استعمال میں لائے گئے ان مکانات کو اٹیچ کرنے کی خاطر اقدامات اُٹھائے جارہے ہیں۔
پولیس ترجمان کے مطابق قومی تحقیقاتی ایجنسی (این آئی اے ) کی عدالت میں سات ملزمان کے خلاف چارج شیٹ پیش کیا گیا۔انہوں نے کہاکہ اس حوالے سے مزید تحقیقات جاری ہے ۔