گاندربل میں اے ٹی ایم فراڈ کا معاملہ پولیس نے حل کیا ملزم گرفتار

سرینگر//
گاندربل میں پولیس نے اے ٹی ایم فراڈ کا معاملہ حل کرتے ہوئے جرم میں ملوث ایک ملزم کو گرفتار کیا اور اس کے قبضے سے مسروقہ نقدی برآمد کی۔
۱۶نومبر۲۰۲۲ کو پولیس سٹیشن گاندربل کو بنگلور کے رہنے والے ایک سیاح کی طرف سے تحریری شکایت موصول ہوئی جس میں نسرین النساء بیوی خلیل بیگ نے کہا کہ اس کا اے ٹی ایم کارڈ کہیں گم ہو گیا ہے اور کسی نامعلوم شخص نے اے ٹی ایم کارڈ کے ذریعے سے اس کے بینک کھاتے سے غیر قانونی طور پر ۷۰ ہزار روپے نکال لیے ہیں۔
اس کے مطابق ایف آئی آر نمبر۳۱۸/۲۰۲۲ کے تحت قانون کی متعلقہ دفعات کے تحت پولیس اسٹیشن گاندربل میں ایک مقدمہ درج کیا گیا اور تحقیقات شروع کی گئی۔
ایس ایچ او پی ایس گاندربل کی سربراہی میں ڈی وائی ایس پی ہیڈ کوارٹر گاندربل شری جی ایچ حسن کی نگرانی میں ایک خصوصی ٹیم تشکیل دی گئی۔ تفتیش کے دوران تکنیکی مدد (سی سی ٹی وی فوٹیج) سے مشتبہ شخص کی نشاندہی کی گئی اور بعد میں اسے گرفتار کر لیا گیا۔ اس کی شناخت دانش رشید بھٹ ولد عبدالرشید بھٹ ساکن درھوما ٹنگمرگ کے طور پر کی گئی ہے۔
پوچھ گچھ کے دوران یہ بات سامنے آئی کہ ملزم نے مذکورہ اے ٹی ایم کارڈ کو پٹرول پمپ گاندربل سے حاصل کیا تھا اور اسے مختلف اے ٹی ایم آؤٹ لیٹس سے نقدی نکالنے کیلئے غیر قانونی طور پر استعمال کیا تھا۔
اس کے قبضے سے غیر قانونی طور پر نکالی گئی نقد رقم۷۰ہزاربرآمد ہوئی ہے۔
عام لوگوں نے مجرم کو پکڑنے اور پیشہ ورانہ انداز میں کیس کو حل کرنے پر پولیس کی تیز رفتار کارروائی کو سراہا ہے۔