آسٹریلیا نے انگلینڈ کو شکست دے کر سیریز میں فاتحانہ سبقت حاصل کی

سڈنی//) اسٹیون اسمتھ (94) اور مارنس لیبوشگن (58) کے درمیان تیسرے وکٹ کے لیے سنچری پارٹنرشپ کے بعد آسٹریلیا نے ایڈم زمپا (45 پر چار وکٹ) اور مشل اسٹارک (چار وکٹ) کی قاتلانہ بولنگ کی بدولت آسٹریلیا نے دوسرے ون ڈے میں ہفتہ کو مہمان انگلینڈ کو 72 رن سے شکست دے کر تین میچوں کی سیریز میں 2-0 کی فیصلہ کن برتری حاصل کر لی۔
سڈنی کرکٹ گراؤنڈ میں ٹاس جیت کر پہلے بیٹنگ کرتے ہوئے آسٹریلیا نے آٹھ وکٹوں پر 280 رن بنائے جس کے جواب میں انگلینڈ کی پوری ٹیم 38.5 اوور میں 208 رن بنا کر پویلین لوٹ گئی۔
زبردست فارم میں چل رہے اسمتھ نے کریز کے دوسرے سرے پر آئے نئے بلے باز لیبوشگن کے ساتھ مل کر ایک منفرد کھیل کا مظاہرہ کیا۔ دونوں بلے بازوں نے ہوشیاری سے کھیلتے ہوئے تیسری وکٹ کے لیے 101 رن جوڑے، تاہم اننگز کے 28ویں اوور میں انگلینڈ کے اسپن گیندباز عادل رشید نے مسلسل دو گیندوں پر لیبوشگن اور ایلکس کیری کو صفر پر آؤٹ کر کے رن ریٹ کو روک دیا۔ اسمتھ بھی راشد کا تیسرا شکار بنے۔ اپنی سنچری مکمل کرنے کے لیے چھکا لگانے کی کوشش میں وہ باؤنڈری لائن پر کھڑے فل سالٹ کی ہاتھوں کیچ ہو کر اپنی وکٹ گنوا بیٹھے۔ مشل مارش (50) نے نصف سنچری بناکر آخری اوور میں رنوں کی رفتار برقرار رکھی جس کی بدولت آسٹریلیا نے ایک مشکل اسکور بنایا۔
جواب میں انگلینڈ کی شروعات انتہائی مایوس کن رہی اور مہمان ٹیم نے پہلے ہی اوور میں جیسن رائے اور ڈیوڈ ملان کی صورت میں کھاتہ کھولے بغیر ہی پہلی دو وکٹیں گنوا دیں۔ مشل اسٹارک نے دونوں کو اپنا شکار بنایا۔ بعد ازاں جیمز ونس (60) اور وکٹ کیپر بلے باز سیم ولنگز (71) نے ٹیم کو ابتدائی جھٹکے سے نکالنے کی بھرپور کوشش کی لیکن ایڈم زمپا کی تباہ کن گیندوں اور دیگر بلے بازوں کی جانب سے تعاون نہ ملنے کی وجہ سے ان کی کوششیں ناکام ثابت ہوئیں اور آخر کار انگلینڈ کو اس کا خمیازہ شکست سے بھگتنا پڑا۔