ممکن ہے اور سو فیصد ممکن ہے کہ ہم غلط ہوں… موسم سرما ہمیں غلط ثابت کرے… ایسا ممکن ہے… لیکن صاحب جو آثار ہمیں نظر آ رہے ہی… موسم سرما جو تیور دکھا رہا ہے… آتے آتے ہی دکھارہا ہے… ہمیں نہیں لگتا ہے اور… اور بالکل بھی نہیں لگ رہا ہے کہ امسال اس کی نیت درست ہے… ٹھیک ہے ۔اگر آتے آتے جبکہ ابھی یہ طفل مکتب ہی ہے‘ حال یہ ہے تو… تو مستقبل کیا ہو گا‘ چلہ کلان کیا ہو گا اور… اور کیسا ہو گا ۔ہم بالائی علاقوں کی بات نہیں کررہے ہیں‘ بالکل بھی نہیں کررہے ہیں‘ ہم گام و دیہات کا بھی ذکر نہیں کررہے ہیں کہ … کہ شہر میں بیٹھ کر ٹھنڈ سے ہمارا یہ حال ہے تو… تو دیہات ‘اور بالائی علاقوں میں کیسا ہو گا… ایسا نہیں ہے اور … اور بالکل بھی نہیں ہے کہ ہمیں ٹھنڈ کی عادت نہیں رہی ہے… لیکن… لیکن صاحب یہ بھی تو سچ ہے کہ سال گزشتہ کے سرما نے ہماری عادت تھوڑی بہت بگاڑ دی… اس نے ہماری عادت میں بگاڑ پیدا کیا اور… اور اس لئے کیا کیونکہ گزشتہ سال سرما … ہم پرمہر بان تھا ‘ چلہ کلان بھی مہر بان رہا … دھوپ کی ایسی تمازت کہ مانو گرما نہیں تو بہار کا گمان ہو جاتا تھا اور… اور سو فیصد ہو جاتا تھا…لیکن صاحب اب کے سرما ایسا ہو … ہمیں نہیں لگتا ہے اور… اور بالکل بھی نہیں لگ رہا … ٹھنڈ ایسی پڑ رہی ہے کہ …کہ جسم میں خون بھی جمنے لگتا ہے… یہ تو ابھی سے حال ہے … آگے آگے چل کر ‘ ایک آدھ ماہ آگے کیا ہو گا… ہم نہیں جانتے ہیں… ہاں اتنا ضرورہے کہ اگر سرما اسی چال سے آگے بڑھتا گیا تو… تو صاحب ایک بات طے ہے کہ پچھلے سرما کا بھی حساب برابر ہو جائیگا … ہم ایسا نہیں کہہ رہے ہیں کہ ایسا ہی ہو گا… لیکن صاحب اس بات کی بھی تو کوئی ضمانت نہیں ہے اور… اور بالکل بھی نہیں ہے کہ ایسا نہیں ہو گا… لیکن صاحب ایک بات ہے اور وہ یہ ہے کہ سرما جس بھی شکل و صورت میں آجائے ہم اس کا مقابلہ کرنے کیلئے تیار ہیں اور… اور سوفیصد ہے … چاہے بجلی ہو نہ ہو‘ ہم اس کا مقابلہ کریں گے… تاریکیوں سے ہی سہی‘ لیکن ہم پیچھے نہیں ہٹیں گے اور… اور اس لئے نہیں ہٹیں گے کہ… کہ اس کامقابلہ کرنے کے علاوہ ہمارے پاس کوئی آپشن نہیں ہے اور… اور بالکل بھی نہیں ہے ۔ ہے نا؟
