امسال موسم سرما میں پہلی بار سونہ مرگ اور دودھ پتھری کو کھلا رکھ رہے ہیں:حسیب

سرینگر//
سیاحت کشمیر کے ڈائریکٹر فضل الحسیب نے ہفتہ کے روز کہا کہ کشمیر کے متعدد سیاحتی مقامات اس موسم سرما میں پہلی بار کھلے رہیں گے۔
ایک مقامی خبر رساں ایجنسی سے بات کرتے ہوئے حسیب نے کہا کہ سیاحتی مقامات بشمول سونمرگ، یوسمرگ اور دودھ پتھری ان جگہوں میں شامل ہیں جو اس موسم سرما میں سیاحوں کے لیے کھولے جائیں گے۔ انہوں نے کہا کہ حکومت موسم سرما کی سیاحت کو شمالی کشمیر کے مشہور اسکیئنگ مقام گلمرگ سے ہٹ کر دیگر مقامات پر لے جانے کی پوری کوشش کر رہی ہے۔
ناظم سیاحت نے کہا کہ حکومت سیاحوں کو راغب کرنے کے لیے ان علاقوں میں ایڈونچر اسپورٹس اور دیگر سرگرمیوں کو شامل کرنے کا منصوبہ بنا رہی ہے۔ انہوں نے کہا ’’نئی سکی ڈھلوانیں برف سے لپٹے ہوئے علاقوں میں تیار کیے جانے کا امکان ہے‘‘۔ انہوں نے مزید کہا کہ بہت جلد ہاؤس بوٹ اور گولف ٹورنامنٹ کا انعقاد کیا جائے گا۔
حسیب نے کہا کہ جہاں بھی ضرورت ہوگی انفراسٹرکچر میں بہتری لائی جائے گی۔ لہٰذا یہ سردیوں میں کھلے رہیں گے اور سیاح اور مقامی لوگ لطف اندوز ہوں گے۔