اکاؤنٹس اسسٹنٹ کواینٹی کرپشن بیورو نے رشوت لیتے ہوئے گرفتار کیا

سرینگر//
جموںکشمیر اینٹی کرپشن بیورو (اے سی بی ) نے صدر ٹریجری سرینگر میں تعینات آڈیٹر (اکاؤنٹس اسسٹنٹ ) کو رشوت لیتے ہوئے رنگے ہاتھوں دھر د بوچ کر سلاخوں کے پیچھے دھکیل دیا۔
اے سی بی کے مطابق راشی اکاؤنٹس اسسٹنٹ کے گھر کی بھی تلاشی لی گئی ہے ۔
اے سی بی کے ایک ترجمان نے بتایا کہ اینٹی کرپشن بیورو میں ایک شخص نے تحریری طورپر شکایت درج کی کہ واجب الادا رقم کی واگزاری کیلئے صدر ٹریجری سرینگر میں تعینات آڈیٹر (اکاؤنٹس اسسٹنٹ ) سعید مجیب اندرابی اُس سے۲۵سو روپیہ رشوت کا تقاضہ کا رہا ہے ۔
ترجمان نے کہاکہ شکایت موصول ہوتے ہی اے سی بی نے اس ضمن میں ایف آئی آر زیر نمبر۲۰۲۲/۱۲ کے تحت ایک کیس درج کرکے مزید تحقیقات شروع کی۔
اینٹی کرپشن بیورو کے مطابق منگل کے روز اے سی بی نے ایک جال بچھایا جس دوران آڈیٹر کو سائل سے ۲۵سو روپے کی رقم لیتے ہوئے رنگے ہاتھوں گرفتار کیا ۔انہوں نے بتایا کہ آزاد گواہوں کی موجودگی میں رشوت کی رقم ضبط کی گئی ۔
ترجمان کے مطابق آڈیٹرکی جامہ تلاشی کے دوران مزید ایک لاکھ ۱۶ہزار۱۲۵روپیہ کی رقم اور سات ہزار روپیہ کی ایک چیک بھی برآمد کی گئی ہے ۔
بیورو نے راشی اکاونٹس اسسٹنٹ کے گھر کی بھی تلاشی لی اور وہاں سے بھی کاغذات ضبط کئے گئے ہیں۔