کیرن سیکٹر میں دراندازی کی کوشش ناکام ‘جنگجو ہلاک

سرینگر//
فوج نے جموںکشمیر کے ضلع کپواڑہ کے کیرن سیکٹر میں لائن آف کنٹرول پر جنگجووں کی طرف سے دراندازی کرنے کی ایک کوشش کو ناکام بنایا جس دوران ایک ملی ٹینٹ مارا گیا۔
دفاعی ذرائع نے بتایا کہ سیکورٹی فورسز نے کپواڑہ کے کیرن سیکٹر کے جمہ گنڈ علاقے میں لائن آف کنٹرول پر پیر کے روز ملی ٹینٹوں کی طرف سے دراندازی کرنے کی ایک کوشش کو ناکام بنا دیا۔
ان کے مطابق دوبدو گولیوں کے تبادلے میں ایک پاکستانی ملی ٹینٹ مارا گیا جس کی شناخت اور تنظیمی وابستگی کے بارے میں جانچ پڑتال شروع کی گئی ہے ۔انہوں نے کہاکہ مہلوک ملی ٹینٹ کے قبضے سے اسلحہ وگولہ بارود اور قابل اعتراض مواد برآمد کرکے ضبط کیا گیا۔اُن کے مطابق علاقے میں تلاشی آپریشن ہنوز جاری ہے ۔
دریں اثنا فوج کے ایک سینئر عہدیدار نے بتایا کہ برف باری سے قبل پاکستان کی جانب سے دراندازی کی کوششوں میں اضافہ کا امکان ہے ۔انہوں نے بتایا کہ برف باری سے قبل پاکستان زیادہ سے زیادہ ملی ٹینٹوں کو اس طرف بھیجنے کی کوشش کرسکتا ہے جس کے پیش نظر لائن آف کنٹرول اور حد متارکہ پر پہلے ہی الرٹ جاری کیا گیا۔
عہدیدار نے بتایا کہ سرحدوں پر تعینات افواج کو چوبیس گھنٹے متحرک رہنے کے احکامات صادر کئے گئے ہیں۔
علاوہ ازیں پولیس چیف دلباغ سنگھ نے اتوار کے روز کہاکہ برف باری سے قبل دراندازی کے واقعات میں اضافہ کا امکان ہے جس کے پیش نظر ایل او سی پر سیکورٹی گرڈ کو مزید مضبوط کیا جارہا ہے ۔انہوں نے بتایا کہ لائن آف کنٹرول پر تعینات افواج کسی بھی چیلنج کا مقابلہ کرنے کے لئے پوری طرح سے تیار ہیں۔
یہ بھی یاد رہے کہ رواں ماہ کی۲۶تاریخ کو فوج نے کپواڑہ کے سیدہ پورہ ٹنگڈار سیکٹر میں دراندازی کی ایک کوشش کے دوران پاکستانی ملی ٹینٹ کو ہلاک کرنے کا دعویٰ کیا تھا۔