زیر تعمیر ریٹلے پن بجلی پاور پروجیکٹ کے قریب مٹی کا تودہ گر آیا

جموں//
جموںکشمیر کے کشتواڑ ضلع میں قائم ریٹلے پاور پروجیکٹ کے قریب بھاری برکم چٹانیں اور مٹی کے تودے گر آنے کے باعث جے سی بی ڈرائیورموقع پر ہی از جان ہوا جبکہ چھ افراد لاپتہ ہیں جنہیں تلاش کرنے کی خاطر ریسکیو آپریشن جاری ہے۔
وزیر اعظم دفتر میں تعینات وزیر مملکت ڈاکٹر جتندر سنگھ نے بتایا کہ ملبے کے نیچے دفن افراد کو بچانے کی خاطر امدادی کارروائی شروع کی گئی ہے۔
اطلاعات کے مطابق ہفتے کی شام کو کشتواڑ میں زیر تعمیر ریٹلے پاور پروجیکٹ کے مقام پر بھاری برکم چٹانیں اور مٹی کے تودے گر آئے۔ابتدائی طور پر معلوم ہوا ہے کہ جے سی بی ڈرائیور معمول کے کام میں مصروف تھا کہ اس دوران مٹی کے تودے گر آنے کے نتیجے میں ڈرائیور ملبے کے نیچے آیا۔معلو ہوا ہے کہ آس پاس موجود جے سی بی ڈرائیور کے ساتھیوں نے امدادی کارورائی شروع کی اس دوران پھر سے لینڈ سلائڈنگ ہوئی جس وجہ سے مزید چھ افراد ملبے کے نیچے زندہ دفن ہوئے۔
ذرائع نے بتایا کہ جے سی بی ڈرائیور کی برسر موقع ہی موت واقع ہوئی جبکہ ملبے کے نیچے زندہ دفن ہونے والے افراد کی بڑے پیمانے پر تلاش شروع کی گئی۔
وزیر اعظم دفتر میں تعینات وزیر مملکت ڈاکٹر جتندر سنگھ نے بتایا کہ چھ افراد کے ملبے کے نیچے آنے کی اطلاع موصول ہوئی ہے۔انہوں نے بتایا کہ جے سی بی ڈرائیور موقع پر ہی از جان ہوا جبکہ ملبے کے نیچے آنے والے چھ افراد کی تلاش شروع کی گئی ہے۔اْن کے مطابق اس بارے میں ڈپٹی کمشنر کشتواڑ سے بھی رابط قائم کرکے ریسکیو آپریشن کے بارے میں دریافت کیا۔
دریں اثنا جموں وکشمیر کے لیفٹیننٹ گورنر منوج سنہا نے اس حادثے پر گہرے رنج وغم کا اظہار کیا۔انہوں نے بتایا کہ ضلع انتظامیہ کو ہدایت دی گئی کہ وہ ریسکیو آپریشن میں تیزی لائے۔اْن کے مطابق فوج ، ایس ڈی آر ایف اور پولیس کی ٹیموں نے ریسکیو آپریشن شروع کیا ہے۔