نئی دہلی /20اکتوبر
نوجوانوں کے امور اور کھیلوں کے مرکزی وزیر انوراگ ٹھاکر نے جمعرات کو پاکستان کرکٹ بورڈ کے اگلے سال ہندوستان میں ہونے والے آئی سی سی ورلڈ کپ میں شرکت کے بارے میں بیان پر سخت ردعمل دیا۔
ایشین کرکٹ کونسل کے سربراہ جے شاہ کے کہنے کے بعد کہ بھارت اگلے سال ہونے والے ایشیا کپ کے لیے پاکستان کا سفر نہیں کرے گا اور ٹورنامنٹ کو پاکستان سے باہر کسی غیر جانبدار مقام پر منتقل کیا جا سکتا ہے، پی سی بی نے سخت بیان جاری کیا تھا جس میں کہا گیا تھا کہ اس طرح کے اقدام سے اگلے سال بھارت میں ہونے والے ورلڈ کرکٹ کپ میں اس کی شرکت اثر انداز ہو سکتی ہے ۔
پی سی بی کے بیان پر ردعمل دیتے ہوئے کھیل اور نوجوانوں کے امور کے وزیر انوراگ ٹھاکر نے کہا ہے کہ 2023 میں بھارت میں ہونے والے ون ڈے ورلڈ کپ میں پاکستان سمیت تمام بڑی ٹیمیں حصہ لیں گی۔
ٹھاکر کاکہنا تھا ”یہ بی سی سی آئی کا معاملہ ہے اور وہ اس پر تبصرہ کریں گے۔ ہندوستان ایک کھیلوں کا پاور ہاو¿س ہے، جہاں کئی ورلڈ کپ منعقد کیے گئے ہیں۔ ون ڈے ورلڈ کپ بھی اگلے سال ہندوستان میں ہوگا اور دنیا بھر کی تمام بڑی ٹیمیں اس میں حصہ لیں گی‘ کیونکہ آپ بھارت کو کسی بھی کھیل میں نظر انداز نہیں کر سکتے، بھارت نے کھیلوں بالخصوص کرکٹ میں بہت تعاون کیا ہے، اس لیے اگلے سال ورلڈ کپ کا انعقاد کیا جائے گا، اور یہ عظیم الشان اور تاریخی ایونٹ ہو گا“۔
ٹھاکر نے کھیلو انڈیا یوتھ گیمز کے اعلان کے لیے ایک تقریب کے دوران کہا” پاکستان میں سکیورٹی خدشات ہیں۔ یہ صرف کرکٹ نہیں ہے۔ ہندوستان کسی کی بات سننے کی پوزیشن میں نہیں ہے“۔
پاکستان اور بھارت 23 اکتوبر بروز اتوار T20 ورلڈ کپ کے سپر 12 میچ میں مدمقابل ہونے والے ہیں۔
اپنے بیان میں پی سی بی نے کہا کہ وہ مسٹر شاہ کے تبصروں پر ’حیران اور مایوس‘ ہوا ہے اور اس طرح کا قدم 2023 میں ہندوستان میں ہونے والے آئی سی سی کرکٹ ورلڈ کپ میں پاکستان کی شرکت کو متاثر کر سکتا ہے۔
