سرینگر/17 اکتوبر
کانگریس کے سینئر لیڈر‘ ڈاکٹر کرن سنگھ نے پیر کو جموں کشمیر میں فوری اسمبلی انتخابات کا مطالبہ کیا اور کہا کہ انہیں پہلی بار دنیا کی مشہور ڈل جھیل کی صفائی دیکھ کر خوشی ہوئی ہے۔
پارٹی کے سرینگر ہیڈکوارٹر میں اے آئی سی سی کی صدارتی ووٹنگ کے موقع پر صحافیوں سے بات کرتے ہوئے سنگھ نے کہا کہ جموں و کشمیر میں انتخابات کے بغیر جمہوریت کو یقینی نہیں بنایا جا سکتا، اس لیے یہاں کی تمام پارٹیاں فوری طور پر انتخابات کرانے کا مطالبہ کر رہی ہیں۔
ڈاکٹرسنگھ نے کہا”ہم سنتے رہے ہیں کہ انتخابات اگلے سال مارچ میں ہوں گے، لیکن ابھی تک کوئی سرکاری تصدیق نہیں ہوئی ہے۔ کانگریس اور دیگر پارٹیاں فوری انتخابات کا مطالبہ کر رہی ہیں اور انہیں جلد از جلد کرایا جانا چاہیے“۔
جموں کشمیر میں غیر مقامی ووٹروں کو شامل کرنے کے بارے میں، انہوں نے کہا کہ اس پر الجھن ہے اور چیزیں واضح نہیں ہیں، اس لیے وہ اس معاملے پر کچھ بھی تبصرہ نہیں کر سکتے۔
ڈاکٹرسنگھ نے کہا کہ حکومت مرکز کے زیر انتظام علاقے میں ترقیاتی پیش رفت کے بارے میں دعوے کر رہی ہے، لیکن زمینی طور پر اس کا اثر دیکھنے میں کچھ وقت لگ سکتا ہے۔
ان کاکہنا تھا”ڈل جھیل کو پہلی بار صاف کیا گیا ہے۔ میں ڈل جھیل کو صاف دیکھ کر خوش ہوں کیونکہ میں نے ذاتی طور پر اس پیش رفت کا مشاہدہ کیا ہے۔“
