جنوبی ضلع شوپیاں میں ’دہشت گردوں‘ نے کشمیری پنڈت کوہلاک کیا :پولیس

سرینگر//
پولیس کاکہنا ہے کہ جنوبی کشمیر کے ضلع شوپیاں کے چودھری گنڈ علاقے میں ہفتے کے روز ’دہشت گردوں‘نے ایک کشمیری پنڈت کو گولیاں مار کر ہلاک کردیا۔
پولیس کے ایک ترجمان نے بتایا کہ شوپیاں کے چودھری گنڈ علاقے میں’دہشت گردوں‘نے ایک کشمیری پنڈت پر اس کی رہائش گاہ پر نزدیکی سے گولیاں چلائیں۔انہوں نے کہا کہ مذکورہ پنڈت کو زخمی حالت میں نزدیکی ہسپتال پہنچایا گیا جہاں ڈاکٹروں نے انہیں مردہ قرار دیا۔
ہلاک شدہ پنڈت کی شناخت پنڈت پورن کرشن بٹ ولد تارک ناتھ بٹ کے بطور ہوئی ہے ۔
دریں اثنا کشمیر زون پولیس نے اپنے ٹویٹر ہینڈل پر واقعے کے متعلق ایک ٹویٹ میں کہا’’شوپیاں چودھری گنڈ میں دہشت گردوںنے اقلیتی فرقے کے ایک عام شہری شری پورن کرشن بٹ پر گولیاں برسائیں جب وہ اپنے میوہ باغ کی طرف جا رہے تھے ‘‘۔
ٹویٹ میں کہا گیا’’انہیں فوری طور ہسپتال منتقل کیا گیا جہاں وہ دم توڑ گئے ‘‘۔
پولیس ٹویٹ میں کہا گیا کہ علاقے کو محاصرے میں لیا گیا ہے اور تلاشی آپریشن جاری ہے ۔
اس دوران وسطی کشمیر کے دپٹی انسپکٹر جنرل پولیس (ڈی آئی جی) سوجیت کمار کا کہنا ہے کہ ابتدائی تحقیقات سے معلوم ہوتا ہے کہ کشمیری پنڈت کی ہلاکت میں ایک جنگجو کے ملوث ہونے کا امکان ہے ۔
بتادیں کہ جنوبی کشمیر کے ضلع شوپیاں کے چودھری گنڈ علاقے میں ہفتے کے روز مشتبہ جنگجوؤں نے ایک کشمیری پنڈت کو گولیاں مار کر جان بحق کر دیا۔
موصوف ڈی آئی جی نے نامہ نگاروںکے ساتھ بات کرتے ہوئے کہا کہ فی الوقت تحقیقات کی جا رہی ہیں اور ابتدائی تحقیقات سے معلوم ہوا ہے کہ یہ حملہ ایک جنگو نے کیا ہے ۔انہوں نے کہا کہ ساری باتیں سامنے آنے کے بعد ہی تفصیلات کو میڈیا کے ساتھ شیئر کیا جائے گا۔
ان کا کہنا تھا کہ اگر ہلاک شدہ کی رہائش گاہ کی حفاظت پر مامور محافظوں یا علاقے کے کسی افسر کی طرف سے سیکورٹی چوک ہوئی ہوگی تو اس کے خلاف کارروائی انجام دی جائے گی۔
دریں اثنا ضلع مجسٹریٹ شوپیاں سچن کمار نے نامہ نگاروں کو بتایا کہ حکومت متاثرہ پنڈت گھرانے کو تمام تر مدد فراہم کر رہی ہے ۔انہوں نے کہا کہ متوفی کی لاش کو آخری رسومات کی انجام دہی کیلئے جموں بھیج دیا جائے گا اور اس کیلئے انتظامیہ تمام تر انتظامات کرے گی۔
دریں اثناجموںکشمیر کے لیفٹیننٹ گورنر‘ منوج سنہا نے ہلاکت کی مذمت کرتے ہوئے ہوئے کہا کہ اس بزدلانہ حرکت کے مرتکبین کو بخشا نہیں جائے گا۔
بتادیں کہ جنوبی کشمیر کے ضلع شوپیاں کے چودھری گنڈ علاقے میں ہفتے کے روز مشتبہ جنگجوؤں نے ایک کشمیری پنڈت کو گولیاں مار کر جان بحق کر دیا۔
سنہا نے اس واقعے کی مذمت کرتے ہوئے اپنے ایک ٹویٹ میں کہا’’شوپیاں میں دہشت گردوں کا پورن کرشن بٹ پر حملہ ایک بزدلانہ حرکت ہے ۔ میں پسماندگان کو تعزیت پیش کرتا ہوں‘‘۔
ایل جی کا ٹویٹ میں مزید کہنا تھا’’میں لوگوں کو یقین دلاتا ہوں کہ (اس حرکت) کے مرتکبین اور دہشت گردوں کو مدد کرنے والوں کو سخت سزا دی جائے گی۔‘‘
اس دوران نیشنل کانفرنس کے نائب صدر اور سابق وزیر اعلیٰ عمر عبداللہ نے بھی اس ہلاکت کی مذمت کی ہے ۔
عمر عبداللہ نے اس واقعے کی مذمت کرتے ہوئے اپنے ایک ٹویٹ میں کہا’’ایک اور قابل مذمت حملہ، میں واضح طور پر اس حملے کی مذمت کرتا ہوں جس میں پورن کرشن بٹ اپنی جان سے ہاتھ دھو بیٹھے ‘‘۔ان کا ٹویٹ میں مزید کہنا تھا’’میں پسماندگان کو تعزیت پیش کرتا ہوں اور پورن جی کے روح کے سکون کے لئے دعا گو ہوں‘‘۔
جموں وکشمیر پیپلز کانفرنس نے واقعے کی مذمت کرتے ہوئے اپنے ایک ٹویٹ میں کہا’’شوپیاں کے چودھری گنڈ میں پورن کرشن بٹ پر حملے جس میں ان کی جان چلی گئی، کی ہم شدید مذمت کرتے ہیں‘‘۔
ٹویٹ میں کہا گیا’’ایسے حملوں کا کسی بھی صورت میں کوئی جواز نہیں ہے ‘‘۔
دریں اثنا سی پی آئی (ایم) کے سینئر لیڈر محمد یوسف تاریگامی نے اپنے ایک ٹویٹ میں کہا’’پورن کرشن بٹ پر ہوئے حملے جس سے ان کی زندگی چراغ بجھ گیا، سے پہنچنے والے تکلیف کو الفاظ میں بیان کرنے سے قاصر ہوں‘‘۔
تاریگامی نے ٹویٹ میں کہا’’عام شہریوں کی ہلاکتوں میں کوئی ٹھہراؤ نظر نہیں آ رہا ہے حکومت کو اقلیتی فرقے کے لوگوں کی فول پروف سیکورٹی کو یقینی بنانا چاہئے ۔‘‘