صوبہ جموںڈینگی سے متاثر‘۲۴۳۰کیس درج

جموں//
جموں کشمیر کی سرمائی راجدھانی جموں میں ڈینگی کے معاملات ۲۴۳۰ ہندسے کو عبورکر گئے اور سب سے زیادہ۲۰۹۵معاملات ضلع جموں میں ریکارڈ کئے گئے۔
محکمہ صحت اور طبی تعلیم نے ڈینگی بیماری پر قابو پانے کی خاطر بڑے پیمانے پر بیداری مہم شروع کی ہے جس کے تحت لوگوں کو احتیاطی تدابیر پر عملدرآمد کرانے کی تلقین کی جارہی ہیں۔
محکمہ صحت کے ایک عہدیدار نے بتایا کہ ڈینگی کے کیسوں میں روز افزاں اضافہ ہو رہا ہے اور پیرتک اس بیماری سے متاثرہ افراد کی تعداد۲۴۹۵سے تجاوز کر گئی۔انہوں نے کہاکہ جموں ضلع میں سب سے زیادہ ۲۰۹۵ کیس سامنے آئے ہیں ‘ سانبہ میں۸۱‘اْدھم پور میں۷۱‘ کٹھوعہ میں۴۷‘ ریاسی میں۴۷‘ ڈوڈہ میں۲۸‘ رام بن میں ۱۷‘ راجوری میں۱۶‘ پونچھ میں۱۴؍اور کشتواڑ میں۱۵کیس رپورٹ ہوئے ہیں۔
معلوم ہوا ہے کہ اتوار کے روز۲۷۰ ٹیسٹ کئے گئے جن میں سے۷۷؍افراد میں اس وائرس کی تشخیص پائی گئی۔انہوں نے کہا کہ ۲۰۱۴ کے بعد پہلی بار اتنی بڑی تعداد میں ڈینگی کے کیسز رپورٹ ہوئے ہیں،جبکہ ماہرین کے مطابق نومبر کے وسط تک کیسز کم ہونا شروع ہو جائیں گے۔
محکمہ صحت کے ایک عہدیدار نے بتایا کہ لوگوں کو ڈینگی سے محفوظ رکھنے کی خاطر مسلسل آگاہی مہم چلائی جارہی ہے۔ انہوںنے بتایا کہ اس بار جموں کے سب سے زیادہ متاثرہ علاقوں میں سروال ، ریہڑی ، جانی پورہ کے علاوہ پلورا شامل ہے۔انہوں نے کہاکہ حکومت کی جانب سے ڈینگی پر قابو پانے کی خاطر اقدامات اٹھائے جار ہے ہیں اور وقتاً فوقتاً ہدایات بھی جاری کی جارہی ہیں۔ لیکن لوگوں کو بیماری سے محفوظ رہنے کی خاطر ماہرین کے مفید مشوروں اور ایس او پیز پر عمل کرنے کی اشد ضروت ہے۔
محکمہ صحت کے عہدیدار کے مطابق بیماری پر قابو پانے کی خاطر لوگوں کو وزارت صحت کی جانب سے وضح کئے گئے رہنما اصولوں پر عمل پیرا ہونا چاہئے تاکہ اس بیماری کو مزید پھیلنے سے روکا جا سکے۔