امیت شاہ کی شمالی کشمیر میںریلی‘دلباغ کا سکیورٹی انتظامات کا جائزہ

سرینگر//
ڈائریکٹر جنرل آف پولیس ‘دلباغ سنگھ نے آج شمالی کشمیر کے بارہمولہ کا دورہ کیا جہاں انہوں نے مرکزی وزیر داخلہ‘امیت شاہ کے یوٹی کے دورے سے قبل سیکورٹی انتظامات کا جائزہ لینے کیلئے ایک میٹنگ کی صدارت کی۔
ڈی جی پی کے ساتھ اے ڈی جی پی کشمیر زون وجے کمار بھی تھے۔
میٹنگ کے دوران مرکزی وزیر داخلہ کے دورے کے لیے حفاظتی انتظامات بشمول راستوں اور مقامات پر بات چیت کی گئی۔ ملاقات میں مختلف فورسز اور انٹیلی جنس ایجنسیوں سے افرادی قوت کی تعیناتی پر بھی تبادلہ خیال کیا گیا۔
پولیس کے ایک ترجمان کے مطابق افسران سے خطاب میں ڈی جی پی نے امیت شاہ کی سیکورٹی کیلئے تعینات مختلف ایجنسیوں اور فورسز کے درمیان زیادہ سے زیادہ ہم آہنگی پر زور دیا۔
دلباغ نے افسران پر زور دیا کہ وہ مشتبہ عناصر کی سرگرمیوں پر نظر رکھیں جو ہمیشہ یو ٹی میں پرامن ماحول کو خراب کرنے کا موقع تلاش کرنے کی کوشش کرتے ہیں۔ انہوں نے افسران کو ہدایت کی کہ مختلف مقامات پر سکیورٹی ڈیوٹی پر مامور اہلکاروں کو مناسب بریفنگ دی جائے۔
ڈی جی پی نے وزیر داخلے کے دورے کے دوران اور مقامات کے راستے میں ٹکنالوجی اور حفاظتی آلات کے استعمال پر زور دیا جس میں سی سی ٹی وی کیمرے بھی شامل ہیں۔ انہوں نے کہا کہ سیکورٹی انتظامات میں شامل ایجنسیوں کے درمیان ہم آہنگی کیلئے ایک جامع مواصلاتی نیٹ ورک کو یقینی بنانا ہوگا۔
ٹریفک انتظامات پر تبادلہ خیال کرتے ہوئے، دلباغ نے پبلک ٹرانسپورٹ کو متبادل راستوں کی طرف موڑنے کے لیے کہا تاکہ عام مسافروں کو سیکورٹی وجوہات کی وجہ سے پریشانی کا سامنا نہ کرنا پڑے۔
ڈی آئی جی شمالی زون اور ایس ایس پی بارہمولہ نے ڈی جی پی کو وزیر داخلہ کے دورے کے سلسلے میں کئے گئے ضروری حفاظتی انتظامات کے بارے میں بتایا۔ انہوں نے انہیں اپنے اپنے دائرہ اختیار میں کیے جانے والے حفاظتی اقدامات کے بارے میں آگاہ کیا۔