کنگن سڑک حادثے میں ۲سیاح ہلاک‘۲۲زخمی

سرینگر//
جموں کشمیر کے وسطی ضلع گاندربل کے ہاری گنیون علاقے میں سیاحوں سے بھری ایک گاڑی ڈرائیور کے قابو سے باہر ہو کر سڑک پر اُلٹ گئی جس کے نتیجے میں ۲سیاحوں کی موقع پر ہی موت واقع ہوئی جبکہ۲۲دیگر زخمی ہوئے ۔
سرکاری ذرائع نے بتایا کہ سری نگر لہیہ شاہراہ پر گنیون کنگن کے نزدیک ایک ٹیمپو جس میں سیاح سوار تھے سڑک پر پھسل گیا ۔انہوں نے بتایا کہ مقامی لوگوں نے حادثے میں زخمی ہوئے سیاحوں کو ٹروما ہسپتال پہنچایا جہاں پر دو کی موت واقع ہوئی جبکہ باقی زخمیوں کو صورہ میڈیکل انسٹی چیوٹ منتقل کیا گیا ہے ۔انہوں نے مزید کہاکہ زخمیوں میں سے کئی ایک کی حالت نازک بنی ہوئی ہے ۔
سرکاری ذرائع نے بتایا کہ حادثہ کیسے پیش آیا اس کی بڑے پیمانے پر تحقیقات شروع کی گئی ہے ۔
دریں اثنا جموں وکشمیر یوٹی کے لیفٹیننٹ گورنر منوج سنہا نے کنگن میں پیش آئے حادثے پر گہرے رنج وغم کا اظہار کرتے ہوئے لواحقین سے تعزیت کا اظہار کیا ہے ۔
اپنے آفیشل ٹویٹر ہینڈل پر منوج سنہا نے لکھا کہ وسطی ضلع گاندربل میں ایک افسوسناک حادثہ پیش آیا جس دورا ن دو سیاحوں کی موت واقع ہوئی جبکہ کئی زخمی بھی ہوئے ہیں۔
سنہا نے بتایا کہ ضلع انتظامیہ گاندربل کو ہدایت دی گئی ہے کہ زخمیوں کو بہتر طبی امداد فراہم کیا جائے ۔
ایل جی نے حادثے میں زخمی ہوئے سیاحوں کی جلد شفایابی کیلئے دعا کی ہے ۔
اس دوران جموںکشمیر کے ضلع اُدھم پور کے کیلا رام نگر علاقے میں ایک نجی گاڑی ڈرائیور کے قابو سے باہر ہو کر گہری کھائی میں جاگری جس وجہ سے۴؍افراد کی موقع پر ہی موت واقع ہوئی جبکہ تین کی حالت ہسپتال میں تشویشناک بنی ہوئی ہے ۔
سرکاری ذرائع نے بتایا کہ جمعرات کے روز اُدھم پور کے کیلا رام نگر کے نزدیک ایک ایکو گاڑی ڈرائیور کے قابو سے باہر ہو کر کھائی میں جاگری ۔
ذرائع نے بتایا کہ حادثے کی اطلاع ملتے ہی پولیس اور مقامی لوگوں نے بچاؤ کارروائی شروع کی گئی جس دوران زخمی ہوئے چھ افراد کو فوری طورپر نزدیکی ہسپتال پہنچایا گیا تاہم ڈاکٹروں نے چار کو مردہ قرار دیا جبکہ تین کی حالت ہسپتال میں نازک بنی ہوئی ہے ۔
ہلاک شدگان میں دس سالہ لڑکا اور ڈیڑھ سال کی بچی شامل ہیں۔پولیس نے اس ضمن میں کیس درج کرکے تحقیقات شروع کی ہے ۔