ایس سی او سربراہی اجلاس میں شرکت کیلئے وزیر اعظم مودی سمر قند پہنچ گئے

نئی دہلی//
وزیر اعظم‘نریندر مودی جمعرات کو شنگھائی کوآپریشن آرگنائزیشن (ایس سی او) کے سربراہی اجلاس میں شرکت کے لیے ازبک شہر سمرقند پہنچ گئے ۔
مودی جمعہ کی صبح روس کے صدر‘ ولادیمیر پوتن سے ملاقات کریں گے ۔سربراہی اجلاس میں چینی صدر شی جن پنگ اور ایران کے ابراہیم رئیسی سمیت دیگر عالمی رہنماؤں کی شرکت بھی ہوگی۔
وزیر اعظم ازبکستان کے صدر شوکت مرزیوف کی دعوت پر ازبکستان کا دورہ کر رہے ہیں۔
مودی نے ٹویٹ کیا’’ایس سی اوسربراہی اجلاس میں شرکت کیلئے سمرقند، ازبکستان کے لیے روانہ ہو رہے ہیں، جس میں علاقائی اور عالمی مسائل کی ایک وسیع رینج پر تبادلہ خیال کیا جائے گا‘‘۔
اس دوران وزیر اعظم مودی نے جمعرات کو کہا کہ وہ شنگھائی تعاون تنظیم (ایس سی او) میں اصلاحات اور توسیع سے اسے کثیر جہتی اور باہمی طور پر فائدہ مند تعاون کا پلیٹ فارم بنانے کے حق میں ہیں ۔
سربراہی اجلاس کے لیے روانہ ہونے سے پہلے اپنے بیان میںمودی نے کہا’’میں ازبکستان کے صدر مسٹر شوکت مرزیوئیف کی دعوت پر شنگھائی کوآپریشن آرگنائزیشن (ایس سی او) کے سربراہان کے اجلاس میں شرکت کیلئے سمرقند کا دورہ کروں گا‘‘۔
مودی نے کہا’’ایس سی او چوٹی کانفرنس میں، میں اہم، علاقائی اور بین الاقوامی مسائل ، ایس سی اوکو وسعت دینے اور تنظیم کے اندر کثیر جہتی اور باہمی طور پر فائدہ مند تعاون کو مزید گہرا بنانے کے بارے میں خیالات کے تبادلے کا منتظر ہوں‘‘۔
وزیر اعظم نے کہا’’ کانفرنس میں ازبک صدارت میں تجارت، معیشت، ثقافت اور سیاحت کے شعبوں میں باہمی تعاون کے حوالے سے متعدد فیصلے کیے جانے کا امکان ہے ‘‘۔
مودی نے کہا’’میں سمرقند میں صدر مرزییویوف سے ملاقات کا بھی منتظر ہوں۔ مجھے۲۰۱۸میں ان کے ہندوستان کے دورہ کو یاد کرتا ہوں۔ انہوں نے۲۰۱۹میں وائبرنٹ گجرات سمٹ میں بطور مہمان خصوصی شرکت کی تھی۔ اس کے علاوہ میں سربراہی اجلاس میں شرکت کرنے والے دیگر رہنماؤں میں سے کچھ کے ساتھ دو طرفہ ملاقاتیں کروں گا۔‘‘