مالی بے ضابطگیوں کا کیس :فاروق عدالت میں پیش نہیں ہو ئے

سرینگر//
نیشنل کانفرنس کے صدر اور سابق وزیر اعلیٰ ڈاکٹر فاروق عبداللہ جموں و کشمیر کرکٹ ایسوسی ایشن میں مبینہ مالی بے ضابطگیوں سے منسلک منی لانڈرنگ کیس کے سلسلے میں آج عدالت میں پیش نہیں ہوسکے۔
فاروق عبداللہ کے وکیل اشتیاق احمد خان نے پرنسپل سیشن جج سرینگر میں کہا کہ این سی کے سربراہ صحت کے مسائل کی وجہ سے عدالت میں حاضر ہونے سے قاصر رہے۔
وہیں پرنسپل جج نے ڈاکٹر فاروق عبداللہ کو اگلی سماعت میں حاضر رہنے کو کہا۔
کورٹ نے اس کیس کی اگلی سماعت ۲۶ ستمبر کی تاریخ مقرر کی ہے۔فاروق عبداللہ کے وکیل نے کورٹ کو یقین دلایا کہ فاروق عبداللہ اگلی سماعت میں شرکت کریں گے۔
بتادیں کہ انفورسمنٹ ڈائریکٹوریٹ (ای ڈی) نے ۲۶ جولائی کو نیشنل کانفرنس کے صدر اور سابق وزیر اعلیٰ ڈاکٹر فاروق عبداللہ کے خلاف جموں و کشمیر کرکٹ ایسوسی ایشن میں مبینہ مالی بے ضابطگیوں سے منسلک منی لانڈرنگ کیس میں چارج شیٹ داخل کی ہے۔
تقریباً دو ماہ قبل فاروق عبداللہ کو ای ڈی دفتر میں پوچھ گچھ کے لیے طلب کیا گیا تھا جہاں ان سے تین گھنٹوں تک پوچھ گچھ کی گئی تھی۔
واضح رہے کہ رواں برس۳۱ مئی کو ڈاکٹر فاروق سرینگر کے راج باغ علاقے میں واقع ای ڈی دفتر پہنچے تھے۔ ای ڈی دفتر میں داخل ہونے سے قبل فاروق عبداللہ نے انہیں ای ڈی سی جانب سے طلب کیے جانے ان سے پوچھ کو آئندہ منعقد ہونے والے اسمبلی انتخابات سے جوڑا تھا۔
اس سے قبل ۲۷مئی کو ای ڈی نے ڈاکٹر فاروق کو سرینگر کے دفتر میں طلب کیا تھا۔ حکام نے بتایا تھا کہ سابق جموں و کشمیر ریاست کے تین بار وزیر اعلیٰ رہنے والے۸۴ سالہ فاروق عبداللہ نے۲۰۱۹ میں اسی معاملے میں اپنا بیان ریکارڈ کرایا تھا۔