سوپور: آتشزدگی کی واردات میںکم از کم چار مکان خاکستر

سرینگر//
شمالی کشمیر کے کھار محلہ آرم پورہ سوپور میں آتشزدگی کی ایک بھیانک واردات کے دوران چار رہائشی مکان خاکستر ہوئے۔
فائر اینڈ ایمرجنسی اور مقامی لوگوں کی بروقت کارروائی کے نتیجے میں آگ پر قابو پایا گیا۔
اطلاعات کے مطابق بدھ کی سہ پہر کو سوپور کے کھار محلہ لالہ بب صاحب آرم پورہ کی بستی میں آگ نمودار ہوئی جس نے آناً فاناً کئی مکانوں کو لپیٹ میں لے لیا۔
ذرائع نے بتایا کہ مقامی لوگوں اور فائر اینڈ ایمرجنسی کی بروقت کارروائی کے نتیجے میں اگر چہ آگ پر قابو پایا گیا تاہم آتشزدگی کی اس واردات میں چار مکان خاکستر ہوئے اور اْن میں موجود لاکھوں روپیہ مالیت کی گھریلو اشیاء بھی راکھ کے ڈھیر میں تبدیل ہوئی۔
فائر اینڈ ایمرجنسی کے ایک سینئر عہدیدار نے بتایا کہ گنجان آبادی کے باوجود بھی فائر اینڈ ایمرجنسی عملے نے کمال جرائت کا مظاہرہ کرکے بستی کو خاکستر ہونے سے بچایا۔
عہدیدار نے کہاکہ دو رہائشی مکان مکمل طورپر خاکستر ہوئے جبکہ دو کو جزوی طورپر نقصان پہنچا۔اْن کے مطابق آگ لگنے کی وجوہات جاننے کی خاطر کیس درج کرکے تحقیقات شروع کی گئی۔