’ہر کسی نے امسال امرناتھ جی یاترا کے مثالی انتظامات اور خوش اسلوبی سے انعقاد کو یقینی بنایا‘

سرینگر//
لیفٹیننٹ گورنر‘ منوج سنہا نے آج راج بھون میں سول انتظامیہ‘ جے کے پی، آرمی، سی اے پی ایف، این ڈی آر ایف، ایس ڈی آر ایف، شری امرناتھ جی شرائن بورڈ کے افسران کو مثالی انتظامات اور اس سال کی شری امرناتھ جی یاترا کے خوش اسلوب انعقاد کے لیے مبارکباد دی۔
اس موقع پر، لیفٹیننٹ گورنر نے وزیر اعظم نریندر مودی اور وزیر داخلہ‘امیت شاہ کا تمام تعاون اور رہنمائی کے لیے شکریہ ادا کیا، جس کی وجہ سے یاترا کامیاب ہوئی۔
لیفٹیننٹ گورنر نے مزید کہا کہا’’عوام، سول سوسائٹی، مذہبی اور سیاسی رہنماؤں، طبی عملے، مرکبانوں، پٹھووالوں، صفائی کے کارکنوں کا ان کے تعاون، یاتریوں کی خدمت کے لیے مکمل لگن اور ان کے آرام اور صحت کیلئے بہترین ممکنہ انتظامات کو یقینی بنانے کیلئے شکریہ‘‘۔
اس بات پر زور دیتے ہوئے کہ شری امرناتھ جی کی یاترا ہندوستان کی قدیم سناتن روایت کی علامت ہے اور جموں و کشمیر کے لیے سب سے بڑے روحانی تہواروں میں سے ایک ہے، لیفٹیننٹ گورنر نے کہا کہ جموں و کشمیر کے ایک کروڑ ۳۰ لاکھ شہریوں نے دل و جان سے یاترا میں حصہ لیا ہے اور ایک نئی تاریخ رقم کی ہے۔
افسران کی محنت کی تعریف کرتے ہوئے لیفٹیننٹ گورنر نے مشاہدہ کیا کہ کامیاب تقریب تمام افسران کی ٹیم جذبہ، قربانی اور خدمات کا نتیجہ ہے۔
لیفٹیننٹ گورنر نے شری امرناتھ جی یاترا؍۲۰۲۲ کے لیے تقریباً ۱۱۰ افسران کو ان کی بے لوث خدمات کے اعتراف میں یادگاری نشانات سے نوازا۔
سنہا نے کہا کہ اس کامیاب یاترا نے کئی نئے ریکارڈ قائم کئے ہیں۔ سب سے زیادہ موسم سے متاثرہ یاترا ہونے کے بعد بھی، تقریباً ۶۵ء۳ لاکھ یاتریوں نے موثر منصوبہ بندی، بے لاگ عمل آوری اور تمام اسٹیک ہولڈرز کے درمیان ہموار تال میل کی وجہ سے مقدس غار میں کامیابی کے ساتھ درشن کیا ہے۔
لیفٹیننٹ گورنر نے مزید کہا کہ شری امرناتھ جی یاترا سے منسلک ہر شخص اور ہر یاتری اب جموں و کشمیر کا برانڈ ایمبیسڈر ہے اور انسانیت اور روحانیت کے اس امتزاج پر ملک کے کونے کونے میں بات ہو رہی ہے۔
سنہا نے ایل جی فیلوز، پی آر آئیز کی اس سال کی یاترا میں ان کے زبردست تعاون کی بھی تعریف کی۔ یاترا کے دوران صفائی، پانی اور سیکورٹی کا انتظام بھی قابل ستائش رہا ہے۔ انہوں نے مزید کہا کہ ہمیں یاتریوں سے جو تاثرات موصول ہوئے ہیں وہ بہت حوصلہ افزا ہیں۔