سیدصلاح الدین کے بیٹے اور بٹہ کراٹے کی اہلیہ سمیت چار ملازم برطرف

سرینگر//
جموں وکشمیر حکومت نے آئین ہند کی دفعہ۳۱۱ کے تحت چار سرکاری ملازموں کو ملک مخالف سرگرمیوں میں ملوث ہونے کے الزام میں نوکریوں سے بر طرف کرنے کے احکامات صادر کئے ہیں۔
نوکریوں سے بر طرف کئے جانے والوں میں متحدہ جہاد کونسل کے سربراہ سید صلاح الدین کا بیٹا اور جموں وکشمیر لبریشن فرنٹ لیڈر بٹہ کراٹے کی زوجہ شامل ہیں۔
حکام کا کہنا ہے کہ ان ملازمین کی سرگرمیاں قانون نافذ کرنے والے اداروں اور انٹلی جنس ایجنسیوں کے نوٹس میں آئی ہیں کیونکہ وہ ریاست کی سلامتی کے مفادات کے خلاف سرگرمیوں میں ملوث پائے گئے ہیں۔
سرکاری حکمنامے کے مطابق دستیاب معلومات کی بنیاد پراور کیسوں کے حقائق و حالات کا جائزہ لینے کے بعد لیفٹیننٹ گورنر کو اطمینان ہوا ہے کہ مذکورہ ملازموں کی سرگرمیاں اس نوعیت کی ہیں کہ انہیں نوکریوں سے بر طرف کیا جائے ۔
برطرف کئے جانے والے ملازموں میں کشمیر یونیورسٹی کے شعبہ کمپیوٹر سائنس کے سائنس داں ڈی ڈاکٹر محیط احمد بٹ ،شعبہ منیجمنٹ سٹیڈیز کے سینئر اسسٹنٹ پروفیسر ماجد حسین قادری، جے کے ای ڈی آئی کے آئی ٹی منیجر سید عبد المعید اور محکمہ دیہی ترقی کی ڈی پی او پبلسٹی اصباح الا رجمند خان شامل ہیں۔
سید عبدالمعید متحدہ جہاد کونسل کے سربراہ سید صلاح الدین کے بیٹے ہیں جبکہ اصباح الا رجمند جموں وکشمیر لبریشن فرنٹ کے لیڈر اور سابق جنگجو کمانڈر فاروق احمد ڈار المعروف بٹہ کراٹے کی زوجہ ہیں۔