کولگام معرکہ آرائی میںشہری ہلاک ‘فوجی جوان زخمی

سرینگر//
جنوبی ضلع کولگام کے ریڈونی گاؤں میں جنگجوؤں اور سیکورٹی فورسز کے بیچ تصادم میں ایک عام شہری ہلاک اور فوجی زخمی ہوا ہے جسے علاج ومعالجہ کی خاطر نزدیکی ہسپتال منتقل کیا گیا۔
پولیس کے ایک ترجمان نے بتایا کہ کولگام کے ریڈونی علاقے میں جمعے کے روز سیکورٹی فورسز اور جنگجوؤں کے مابین گولیوں کا تبادلہ ہوا ۔
ترجمان نے بتایا کہ جنوبی کشمیر کے ریڈونی کولگام میں ملی ٹینٹوں کے چھپے ہونے کی ایک خاص اطلاع موصول ہونے کے بعد پولیس اور سیکورٹی فورسز نے جمعے کے روز اس علاقے کو اپنے محاصرے میں لے کر اُنہیں ڈھونڈ نکالنے کیلئے تلاشی کارروائی کا آغاز کیا۔
پولیس ترجمان نے بتایا کہ جوں ہی سیکورٹی فورسز کے اہلکار مشتبہ مقام کے نزدیک پہنچے تو وہاں پر موجود ملی ٹینٹوں نے فورسز پر اندھا دھند فائرنگ شروع کی ۔انہوں نے کہاکہ سلامتی عملے نے بھی پوزیشن سنبھال کر جوابی کارروائی کا آغاز کیا جس دوران دوبدو گولیوں کا تبادلہ شروع ہوا۔
پولیس ذرائع نے بتایا کہ جنگجوؤں کی ابتدائی فائرنگ میں ایک عام شہری اور ایک فوجی جوان زخمی ہوئے جنہیں علاج و معالجہ کی خاطر نزدیکی ہسپتال منتقل کیا گیا۔جہاں زخمی شہری‘منظور احمد لون ولد عبداللہ لون ساکہ ریڈونی بالا زخموں کی تاب نہ لا کر دم توڑ بیٹھا ۔
ذرائع کے مطابق ابتدائی فائرنگ کے بعد علاقے میں خاموشی چھا گئی جس کے بعد سیکورٹی فورسز نے ایک وسیع علاقے کو محاصرے میں لے کر فرار ہونے کے سبھی راستوں پر پہرے بٹھا دئے ۔
ذرائع کاکہنا ہے کہ فوجی آپریشن کو اب ختم کردیا گیا ہے۔