مودی حکومت کی آمریت سے ڈرنے نہیں، لڑنے کی ضرورت ہے : راہل

نئی دہلی// کانگریس کے سابق صدر راہل گاندھی نے عوام سے مطالبہ کیا ہے کہ مودی حکومت اپنے خلاف بولنے والوں کی آواز کو دبانے کی کوشش کر رہی ہے ، اس لیے ان کی آمریت سے ڈرنے کے بجائے اس کے خلاف لڑنے کی ضرورت ہے ۔
منگل کو فیس بک پر پوسٹ کیے گئے ایک پیغام میں مسٹر گاندھی نے کہا کہ عام لوگ کانگریس کی طاقت ہیں اور جن لوگوں پر حکومت ظلم کر رہی ہے انہیں خود کو تنہا سمجھنے کی ضرورت نہیں ہے ۔ کانگریس ان کی آواز ہے اور ان کے ساتھ مل کر ان کی لڑائی لڑے گی۔
انہوں نے کہاکہ "ہمیں ڈکٹیٹر کی عوام کی آواز کو دبانے کی ہر کوشش کا مقابلہ کرنا ہے ۔ آپ کے لیے میں اور کانگریس پارٹی لڑتے رہے ہیں، اور آگے بھی لڑیں گے ۔ آج ملک میں کن کن مسائل پر بات ہونی چاہیے ۔ اچھی طرح جانتے ہیں کیونکہ حکومت کی ہر غلط پالیسی آپ کی زندگی کو متاثر کر رہی ہے ۔
مسٹر راہل گاندھی نے کہا کہ کانگریس پارلیمنٹ کے موجودہ اجلاس میں حکومت سے عوام کے سوالوں کے جواب مانگنے کی کوشش کر رہی تھی، لیکن سب نے دیکھا ہے کہ حکومت نے کس طرح اپوزیشن کے اراکین پارلیمنٹ کو معطل کیا اور جب کانگریس نے پالیسیوں کی مخالفت کی تو انہیں گرفتار کیا گیا۔ ایوان ملتوی کروایا گیا اور کل جب بحث ہوئی تو حکومت نے صاف کہہ دیا کہ مہنگائی کوئی مسئلہ ہے ہی نہیں!
انہوں نے کہا کہ ملک بے روزگاری کی وبا سے لڑ رہا ہے ، کروڑوں خاندانوں کے پاس مستحکم آمدنی کا کوئی ذریعہ نہیں ہے ۔ لیکن حکومت صرف ایک ‘اہنکاری راجہ’ کی شبیہ چمکانے کے لیے اربوں روپے خرچ کر رہی ہے ۔ مہنگائی اور ‘گبر سنگھ ٹیکس’ عام آدمی کی آمدنی پر براہ راست حملہ ہے ۔ آج کی حقیقت یہ ہے کہ عام آدمی اپنے خوابوں کے لیے نہیں بلکہ دو وقت کی روٹی کے لیے لڑ رہا ہے ۔
مسٹر گاندھی نے کہا کہ حکومت چاہتی ہے کہ لوگ ڈکٹیٹر کی ہر بات کو بغیر کسی سوال کے قبول کریں۔ انہوں نے کہا کہ میں آپ سب کو یقین دلاتا ہوں کہ ان سے ڈرنے اور آمریت کو برداشت کرنے کی ضرورت نہیں ہے ، یہ بزدل ہیں، آپ کی طاقت اور اتحاد سے خوفزدہ ہیں، اس لیے وہ ان پر مسلسل حملے کر رہے ہیں، اگر آپ متحد ہو کر ان کا مقابلہ کریں گے ، تو یہ ڈر جائیں گے ۔ میں آپ سے وعدہ کرتا ہوں، ہم نہ تو ڈریں گے اور نہ ہی انہیں آپ کو ڈرانے دیں گے ۔’