گاندھی جی کی سالگرہ کے موقع پر چٹاگانگ میں ہندوستانی مشن کی جانب سے ساحلِ سمندر کی صفائی مہم

چٹاگانگ، 2 اکتوبر (یو این آئی) بنگلہ دیش کے چٹاگانگ میں ہندوستان کے اسسٹنٹ ہائی کمیشن نے مہاتما گاندھی کی 157ویں یومِ پیدائش کے موقع پر پتینگا سی بیچ پر ساحلِ سمندر کی صفائی مہم کا اہتمام کیا۔
مقامی وقت کے مطابق صبح 9 بجے سے 11 بجے تک جاری رہنے والی اس مہم کا انعقاد ہندوستانی مشن نے ’سوچھتا میں سَہ بھاگ، سوچھ بھارت، وکست بھارت‘ کے موضوع کے تحت کیا۔ یہ مہم ہندوستان اور اس کے دنیا بھر میں واقع سفارتی مشنز میں 17 ستمبر سے 2 اکتوبر 2026 تک منائے جانے والے ’سیوا پکھواڑہ 2026‘ کا حصہ تھی۔
اسسٹنٹ ہائی کمشنر سمیت بھارتی مشن کے دیگر افسران اور ملازمین نے صفائی مہم میں حصہ لیا۔ چٹاگانگ گرامر اسکول کے تقریباً 100 طلبہ نے بھی مہم میں شرکت کی۔ طلبہ نے ساحل سے پلاسٹک، پولی تھین اور دیگر کچرا جمع کرکے اسے مقررہ مقامات پر پہنچایا۔
طلبہ سمیت صفائی مہم میں شریک تمام افراد اور منتظمین کو ’سوچھتا ہی سیوا‘ مہم کے موضوع سے مزین ٹی شرٹس بھی فراہم کی گئیں۔
چٹاگانگ میٹروپولیٹن پولیس اور ٹورسٹ پولیس نے تقریب کے دوران سکیورٹی فراہم کرنے کے ساتھ امن و امان برقرار رکھا۔
ہندوستانی مشن نے کہا کہ اس مہم کا مقصد نوجوانوں کی شرکت کے ذریعے ماحولیاتی تحفظ اور صفائی ستھرائی کو فروغ دینا، جبکہ مقامی افراد اور دیگر سیاحوں میں بھی اس حوالے سے بیداری پیدا کرنا تھا۔
اسی طرح بنگلہ دیش میں ہندوستانی ہائی کمشنر نے افسران کو باضابطہ طور پر سوچھتا عہد دلایا، جبکہ سفارت خانے نے صفائی ستھرائی کے کارکنوں کی خدمات کے اعتراف میں ان کی حوصلہ افزائی کے لیے فلاحی سرگرمیوں کا بھی اہتمام کیا۔ ڈیلی سن کی رپورٹ کے مطابق کھلنا، سلہٹ اور راجشاہی میں اسسٹنٹ ہائی کمیشنوں نے بھی اسی طرح کے پروگرام منعقد کیے۔