ادھم پور؍۲۶ ستمبر
ڈائریکٹر جنرل آف پولیس (ڈی جی پی) نلن پربھات نے انسپکٹر جنرل آف پولیس (آئی جی پی) جموں زون تیجندر سنگھ کے ہمراہ ادھم پور کا دورہ کیا اور ادھم پور-کٹھوعہ پٹی میں جاری انسدادِ دہشت گردی کارروائیوں کا جائزہ لیا۔
دورے کے دوران ڈی جی پی نے علاقے میں سکیورٹی فورسز کی جانب سے جاری کارروائیوں کی پیش رفت اور مجموعی آپریشنل صورتحال کا جائزہ لیا۔ افسران نے موجودہ سکیورٹی صورتحال کے پیش نظر حفاظتی انتظامات اور آپریشنل تیاریوں کا بھی جائزہ لیا۔
ڈی جی پی نلن پربھات نے کارروائیوں میں شامل بہادر اہلکاروں کو توصیفی اعزاز سے نوازا اور ان کی جرأت، عزم اور پیشہ ورانہ طرزِ عمل کو سراہا۔
اہلکاروں کو آپریشن سوان کے دوران دو پاکستانی جیشِ محمد کے دہشت گردوں کو ہلاک کرنے میں اہم کردار ادا کرنے پر سراہا گیا۔
ڈی جی پی نے سکیورٹی فورسز کی مربوط کوششوں کی تعریف کرتے ہوئے انسدادِ دہشت گردی کارروائیوں میں مصروف تمام اداروں کے درمیان مسلسل چوکسی، آپریشنل تیاری اور قریبی تال میل کی اہمیت پر زور دیا۔
آئی جی جموں زون تیجندر سنگھ نے بھی ڈی جی پی کے ہمراہ دورہ کیا اور ادھم پور-کٹھوعہ پٹی میں آپریشنل امور اور سکیورٹی انتظامات کا جائزہ لیا۔
۔۔۔۔۔
(ایجنسیاں )
