۲۴؍اپریل کو’ پنچایتی راج ڈے‘ پر وزیر اعظم جموں کشمیر آئیں گے

جموں/۱۸مارچ
وزیر اعظم نریندر مودی۲۴؍ اپریل کو ’پنچایتی راج ڈے‘ کے موقع پر جموں و کشمیر کا دورہ کریں گے۔ اس دوران وزیر اعظم پنچایتی راج اداروں کے ارکان سے بات چیت کریں گے۔
دورے کے دوران وزیر اعظم صنعتی سرمایہ کاری کا آغاز کریں گے اور مختلف ترقیاتی منصوبوں کا افتتاح کریں گئے یا سنگ بنیاد رکھیں گئے۔
سرکاری ذرائع کے مطابق ۲۴؍ اپریل کو پنچایتی راج ڈے کے موقع پر وزیر اعظم کے جموں و کشمیر کے دورے کو حتمی شکل دی گئی ہے۔ اس موقع پر یو ٹی انتظامیہ کی جانب سے کئی ترقیاتی منصوبوں کے افتتاح اور سنگ بنیاد رکھنے کے لیے بھی استعمال کیا جائے گا۔
واضح رہے کہ ’پنچایتی راج دن‘ہر سال ۲۴؍اپریل کو پورے ملک میں منایا جاتا ہے۔گزشتہ کچھ سالوں کے دوران وزہر اعظم نریندر مودی اس موقع پر پنچایت ممبران سے بات چیت کیلئے مختلف ریاستوں کا دورہ کر رہے ہیں۔ اس سال جموں اور کشمیر کو وزیر اعظم کے دورے کے لیے منتخب کیا گیا ہے۔
ذرائع کے مطابق مرکزی حکومت یوٹی انتظامیہ کے ساتھ مشاورت سے تقریب کے مقام کو حتمی شکل دے گئی۔ غالب امکان یہ ہے کہ تقریب جموں میں ہوگی۔
جموں و کشمیر دورے کے دوران وزیر اعظم پنچایتی راج اداروں بشمول ضلع ترقیاتی کونسلوں، بلاک ترقیاتی کونسلوں اور پی آر آئی سرپنچوں اور پنچوں سے خطاب کریں گے۔
جموں و کشمیر کی خصوصی حیثیت کے خاتمے اور سابقہ ریاست کو دو مرکز کے زیر انتظام علاقوں میں تقسیم کرنے کے بعد سرحدوں کے علاوہ یہ وزیر اعظم کا جموں و کشمیر کا پہلا دورہ ہوگا۔وزیر اعظم نے نے ۲۷؍ اکتوبر سنہ ۲۰۱۹ کو راجوری اور ۳ نومبر ۲۰۲۱ کو جموں ڈویڑن کے نوشہرہ سیکٹر میں فوجی جوانوں کے ساتھ دیوالی منائی تھی۔
ریاست کے طور پر وزیر اعظم نریندر مودی کا جموں و کشمیر کا ان کا آخری دورہ ۳ فروری۲۰۱۹ کو تھا جب انہوں نے تینوں خطوں بشمول جموں، سرینگر اور لداخ کا دورہ کیا تھا اور اس دوران ہزاروں کروڑ روپے کے پروجیکٹوں کا آغاز کیا تھا۔